Hádegisfréttir

Hádegisfréttir 13. janúar 2025

Landskjörstjórn hefur kallað eftir skýringum á að tuttugu og fimm möguleg atkvæði komu ekki til talningar í Suðvesturkjördæmi og lítur það alvarlegum augum.

Miðstjórn Sjálfstæðisflokksins kom saman í hádeginu. Búist er við að á fundinum verði dagsetning landsfundar staðfest.

Vindur í Los Angeles magnast í dag samkvæmt veðurspá og það gerir slökkvistarf enn erfiðara. Tuttugu og fjórir hafa farist og tuga er saknað.

Norsk stjórnvöld ætla í vikunni að hafa milligöngu um viðræður um tveggja ríkja lausn í deilu Palestínumanna og Ísraela.

Einn var fluttur á slysadeild á Akureyri í gær eftir hópárás í heimahúsi við Óseyri. Fimm voru handteknir. Maðurinn sem ráðist var á er ekki í lífshættu.

Karlmaður á fertugsaldri hefur verið ákærður fyrir tilraun til manndráps fyrir að hafa tekið annan mann kyrkingartaki í sjö mínútur. Hann var dæmdur í fimm ára fangelsi í Sólheimajökulsmálinu svokallaða.

Tugir skemmtiferðaskipa hafa afboðað komu til hafna við Ísland, eftir að innviðagjald lagðist á farþega skipa um áramót. Formaður Cruise Iceland vonar að ný ríkisstjórn taki málið upp að nýju.

Starfsmenn sem sauma föt fyrir kínverska tískurisann She-in vinna allt að sjötíu og fimm tíma á viku.

Freyr Alexanderson verður kynntur sem þjálfari norska fótboltaliðsins Brann í dag. Hann hafði verið orðaður við starf landsliðsþjálfara Íslands en nú er ljóst að hann tekur ekki við því.