Fleiri drengir flosna upp úr námi hér á landi en annars staðar í Evrópu. Hlutfallið hefur hækkað stöðugt síðustu fjögur ár. Háskólaráðherra segir að breytingar hafi verið gerðar til að hvetja nemendur til þess að ljúka námi.
Hlutdeildarlán til fyrstu kaupa fást ekki lengur, því féð er uppurið. Fólk gæti misst af íbúðum sem það hefur boðið í vegna þessa.
Alþjóðadómstóllinn í Haag birtir innan skamms, úrskurð í máli Suður-Afríku gegn Ísrael um innrás í Rafah á Gaza. Herinn hefur hert árásir á borgina, þar sem hundruð þúsunda leita skjóls.
Sjór hefur nær aldrei mælst jafn hlýr við Suðurland á þessari öld og á fyrstu mánuðum ársins. Óttast er að það hafi slæm áhrif á lundavarp í Eyjum og afkomu unga.
Nær fimmtíu manns eru enn á sjúkrahúsi í Taílandi eftir að hafa slasast í mikilli ókyrrð í flugvél á þriðjudag. Einn Íslendingur er þar á meðal. Margir slösuðust á mænu eða hrygg.
Foreldrar barna í Víðistaðaskóla vöktuðu gönguleiðir í skólann í morgun vegna tilkynninga um mann sem hefur veist að, og ráðist á, börn í Hafnarfirði.
Íslendingar kjósa í dag utan kjörfundar á Kanarí eyjum í forsetakosningunum. Talsverð vandræði hafa verið í framkvæmd atkvæðagreiðslunnar. Utanríkisráðuneytið ábyrgist að öll kjörgögn berist tímanlega.
Suðaustanhvassviðri gengur nú yfir sunnan- og vestanvert landið. Spáð er mikilli rigningu vestanlands og töluverð hætta er á skriðum og grjóthruni.
