Formaður Landssambands lögreglumanna segir lögreglumenn hafa fengið líflátshótanir í tengslum við mótmæli undanfarið. Harka í samfélaginu hafi aukist til muna og hafi mikil áhrif á störf lögreglu.
Aðstoðarlögreglustjóri á höfuðborgarsvæðinu segir að erindi fjármálaráðherra til embættisins um netsölu áfengis hafi engin áhrif á rannsóknina. Afskipti ráðherra séu ekki til fyrirmyndar í réttarríki.
Þung orð féllu á Alþingi við upphaf þingfundar þegar þingmenn stjórnarandstöðunnar gagnrýndu ríkisstjórnina fyrir slæleg vinnubrögð. Forsætisráðherra var sagður vanhæfur og honum líkt við ofdekraðan smástrák.
Lokað var að Dettifossi í morgun, þar eru aðstæður mjög varasamar, krapi og vatn flýtur yfir göngustíga. Þjóðgarðsvörður segir óljóst hvenær hægt verður að opna aftur.
Fyrsti heildarsamningur ríkisins við tannlækna hefur verið undirritaður . Samningnum er ætlað að tryggja greiðsluþátttöku fyrir börn, aldraða og öryrkja til næstu fimm ára.
Netárásir voru gerðar á ríkisstofnanir í Sviss sem koma að friðarráðstefnu um Úkraínu um helgina. Ekki voru unnar varanlegar skemmdir og truflun var minniháttar, samkvæmt Netöryggisstofnun landsins.
Evrópudómstóllinn hefur sektað Ungverjaland um 200 milljónir evra, sem jafngilda rúmum 30 milljörðum króna, fyrir að neita að hlíta lögum um hælisleitendur.
Og í fréttatímanum heyrum við af Bíladögum sem byrjuðu á Akureyri í morgun.
