Íslendingar kjósa nýjan forseta í dag, þann sjöunda á lýðveldistímanum. Tólf eru í framboði. Kjörstaðir voru opnaðir víða klukkan níu og þar sem lengst er opið er hægt að kjósa til klukkan tíu í kvöld.
Kjósandi sem gerir mistök í kjörklefanum, getur óskað eftir nýjum kjörseðli.
Forsætisráðherra Ísraels krefst þess áfram að Hamas-samtökin verði upprætt, eigi að nást friður á Gaza. Bandaríkjaforseti kynnti í gær tillögur Ísraelsmanna sem nýjan vegvísi að friði.
Gosið við Sundhnúksgíga er stöðugt. Búist er við að Grindvíkingar komi í bæinn í dag til að flytja búslóðir sínar burt.
Afríska þjóðarráðið missti þingmeirihluta sinn í kosningunum í Suður-Afríku í gær. Þetta er versta útkoma flokksins í þingkosningum yfir þrjátíu ár.
Hæstiréttur Bandaríkjanna hefur tekið að sér óvenju mörg mál sem snerta bandarískt samfélag á starfstímabili sínu sem er senn á enda. Dómstóllinn virðist stefna á fleiri umdeilda dóma sem geti skaðað stofnuna til lengri tíma, segir lektor í lögfræði.
