Hlaupinu úr Mýrdalsjökli er lokið. Enn er þó víða uppsafnað vatn, og mikill elgur í ánni Skálm.
Hringvegurinn er enn rofinn við Skálmarbrúna og lokaður milli Víkur og Kirkjubæjarklausturs. Viðgerðir hófust í morgunsárið og stefnt að því að opna fyrir umferð fyrir kvöldið.
Hlaupið í gær er fjórða stóra hlaupið úr Kötlu frá árinu 1918. Þetta segir Magnús Tumi Guðmundsson jarðeðlisfræðingur. Hámarksrennslið var þó nokkru minna en í jökulhlaupunum 2011 og 1999. Hlaupið sýni að ekki megi slaka á gagnvart Kötlu og Mýrdalsjökli.
Hótelstjóri á Hótel Klaustri á Kirkjubæjarklaustri segir að margir af gestum hótelsins hafi orðið fyrir áhrifum vegna hlaupsins. Margir séu enn fastir eða hafi þurft að gera ráðstafanir til að komast í flug.
Vonir eru enn uppi um að Skaginn 3X verði endurreistur á bænum segir bæjarstjóri Akraneskaupstaðar. Engir samningar hafa tekist um þrotabúið eftir að gjaldþrot varð í byrjun mánaðar.
Forsetakosningar verða í Venesúela í dag. Forsetinn undanfarin ellefu ár, Nicolas Maduro, sækist eftir endurkjöri næstu sex árin. Í stjórnartíð hans hafa tæplega átta milljónir flúið land.
Ásgrímssafn í Reykjavík hefur verið lokað almenningi frá því snemma á þessu ári. Safnstjóri segir að vegna takmarkaðs fjármagns þurfi að forgangsraða. Opnunartímar hafa verið rýmkaðir í öðrum húsum safnsins.
Snæfríður Sól Jórunnardóttir komst áfram upp úr undanrásum í 200 metra skriðsundi á Ólympíuleikunum í París
