Forsætisráðherra Ísraels hefur frestað atkvæðagreiðslu í ríkisstjórn um vopnahlé á Gaza. Hamas hafnar ásökunum hans um að ætla ekki að standa við samkomulag um vopnahlé.
Þrjátíu ár eru í dag frá því að snjóflóð féll á Súðavík og fjórtán létust, þar af átta börn. Þetta er eitt mannskæðasta snjóflóð Íslandssögunnar. Rannsóknarnefnd um flóðin tók til starfa um áramót.
Tilkynningum um kynferðisbrot fjölgaði um tíu prósent í fyrra, samanborið við árið á undan. Tæplega fjórðungur tilkynninga var um brot gegn börnum.
Þótt aðildarumsókn Íslands að Evrópusambandinu sé enn virk þyrfti væntanlega að taka upp aftur þá kafla sem búið var að loka í viðræðunum, að mati lagaprófessors.
Hlaupið í Grímsvötnum náði líklega hámarki í gærkvöldi eða nótt. Sérfræðingar Veðurstofunnar búast ekki við að hlaupið verði stórt en það skili sér í Gígjukvísl eftir einn til tvo sólarhringa.
Rannsóknaskip Hafrannsóknastofnunar og fjögur veiðiskip halda til loðnurannsókna í dag og á morgun. Mikið er í húfi, að það takist að mæla nógu stóran veiðistofn svo hægt verði að gefa út loðnukvóta.
Óvenjulítill snjór er á Öxi og í byrjun vikunnar var ákveðið að ryðja og opna Axarveg sem er óvenjulegt um miðjan vetur. Djúpavogsbúum hefur löngum gramist að vegurinn sé lokaður þegar lítið þarf til að opna.
Fyrsti leikur íslenska karlalandsliðsins í handbolta á HM er í kvöld. Liðið mætir Grænhöfðaeyjum.
