Skipstjóri og annar stýrimaður flutningaskipsins Longdawn hlutu skilorðsbundna fangelsisdóma í héraðsdómi í morgun fyrir að yfirgefa mann í sjávarháska - eftir að þeir sigldu skipinu á bát úti fyrir Garðskaga í vor.
Stórir styrktaraðilar framboðs Joes Biden til endurkjörs sem Bandaríkjaforseta efast um að hann eigi að halda því til streitu. Tvö neyðarleg mismæli í gærkvöld hafa aukið umræðu um hvort hann ráði við embættið.
Ljósmæður undirrituðu í gær fjögurra ára kjarasamning við ríkið. Miðað er við sömu launahækkun og í öðrum opinberum samningum.
Kílómetragjald verður tekið upp fyrir öll ökutæki frá næstu áramótum. Tekjur af olíu- og bensíngjöldum hafa dregist saman. Framkvæmdastjóri Betri samgangna segir breytta gjaldtöku nauðsynlega vegna orkuskipta.
Forstjóri Heilbrigðisstofnunar Suðurlands segir ákvörðun um flutning heilsugæslunnar í Laugarási í Biskupstungum til Flúða, vera heillaskref. Hún harmar neikvæða umræðu um flutninginn.
Rúnar Rúnarsson leikstjóri segist þreyttur og vonast til þess að hann geti brátt lagt sig. Hann átti opnunarmyndina í Cannes og önnur mynd hans hefur verið valin til að keppa um stuttmyndaverðlaunin í Feneyjum.
Valur hefur tilkynnt ólæti stuðningsmanna albanska félagsins Vllaznia í gærkvöld til evrópska knattspyrnusambandsins. Stuðningsmenn albanska liðsins réðust að öryggisvörðum og köstuðu aðskotahlutum í dómara.
Fjöldi bæjarhátíða fer fram um landið um helgina, og þar á meðal er Hríseyjarhátíð. Við heyrum í Hríseyingum í fréttatímanum.
Spáð er hvassviðri vestanlands næstu daga en blíðu fyrir austan.
