Lögreglan á Akureyri rannsakar andlát konu í heimahúsi í nótt. Grunur er um að andlátið hafi borið að með saknæmum hætti, einn var handtekinn á vettvangi.
Fólk með skerta starfsgetu getur haft tekjur upp á þrjú hundruð og fimmtíu þúsund krónur án þess að örorkulífeyrir þeirra verði skertur, samkvæmt breytingum á örorkukerfinu, sem félagsmálaráðherra kynnti í dag. Ráðstöfunartekjur mikils meirihluta öryrkja aukast um rúmlega þrjátíu þúsund krónur á mánuði. Félagsmálaráðherra segir að með þessu sé skapaður meiri hvati til vinnu.
Litháarnir sem tengjast manndrápsmáli á Kiðjabergi unnu við að reisa bústað við hliðina á þeim sem maður fannst látinn í á laugardag. Fjórir hafa verið úrskurðaðir í gæsluvarðhald og að minnsta kosti þrír hafa kært úrskurðinn til Landsréttar.
Hæstráðandi herleyniþjónustu Ísraels sagði í morgun af sér vegna ódæða Hamas 7. október. Hann segir í uppsagnarbréfi að stofnunin hafi brugðist skyldum sínum þann örlagaríka dag.
Börn á Vopnafirði verða bólusett gegn mislingum í dag til að fyrirbyggja faraldur eftir að smit greindist um helgina. Sóttvarnalæknir metur hvort flýta eigi bólusetningu barna um allt land. Heilsugæsla höfuðborgarsvæðisins hvetur fólk sem hyggur á ferðalög til Evrópu og Bandaríkjanna að yfirfara bólusetningar sínar.
Samfylkingin ætlar ekki að sækja á mið þjóðernispopúlisma segir varaformaður flokksins. Óánægju gætir meðal hóps flokksmanna um stefnu flokksins í útlendingamálum.
Málflutningur hefst í dag í fyrsta sakamálinu af fjórum gegn Donald Trump fyrrverandi Bandaríkjaforseta. Trump er sakaður um bókhaldsfölsun vegna peningagreiðslna til klámstjörnu, og það verður líklega eina málið sem dæmt verður í fyrir forsetakosningar í nóvember.
