Úkraínumenn eiga skilið sannan frið, segir Úkraínuforseti. Það sé jafn kristaltært og vatnið á Þingvöllum í gær. Hann ávarpaði þing Norðurlandaráðs í morgun.
Verkfall kennara í níu skólum er hafið. Til stóð að leikskólinn Ársalir á Sauðárkróki yrði opinn, þrátt fyrir verkfall, en frá því var horfið í morgun.
Tilraun til verkfallsbrots getur spillt kjaraviðræðum segir formaður Kennarasambandsins. Formaður Félags leikskólakennara, sem fór norður í verkfallsvörslu, segir dapurlegt að þurfa að vera þar en ekki við samningaborðið.
Formaður Samfylkingarinnar segir að skilaboð þar sem hún hvatti kjósanda til að strika út nafn Dags B. Eggertssonar, séu þekkt aðferð í íslenskum stjórnmálum - óheppilegt sé að skilaboðin hafi verið birt.
Yfirmaður Palestínuflóttamannahjálpar Sameinuðu þjóðanna segir að Ísrael brjóti gegn alþjóðlegum skuldbindingum sínum með því að banna starfsemi hennar.
Rúmur helmingur lækna hjá hinu opinbera hefur greitt atkvæði um boðun verkfalla í nóvember. Formaður Læknafélagsins segir að þolinmæðin sé á þrotum eftir margra mánaða árangurslausa samningafundi.
Æðarbændur eru sumir í sárum eftir mikla bleytutíð í sumar. Vonskuveður í júní spillti varpi á Norður- og Norðausturlandi.
Forráðamenn spænska fótboltaliðsins Real Madrid eru ævareiðir eftir afhendingu Gullboltans, verðlauna knattspyrnufólks ársins, í gærkvöld.
