Sýknudómur í hryðjuverkamálinu í gær verður ekki til þess að hættustig vegna hryðjuverka verði lækkað. Hættustigið var hækkað þegar málið kom upp en yfirmaður hjá Ríkislögreglustjóra segir fleiri þætti koma til en þetta einstaka mál.
Formaður lögmannafélagsins segir ekkert því til fyrirstöðu að fólk, sem sakborningar í hryðjuverkmálinu ræddu sín á milli um að vinna mein, leggi sjálft fram kæru á hendur mönnunum.
Bilið í kjaradeilu Samtaka atvinnulífsins og VR hefur minnkað en samningamönnum SA hugnast ekki ummæli á heimasíðu VR um að verkbann geti sett fjölda fyrirtækja á hliðina með alvarlegum afleiðingum fyrir launamenn og fyrirtæki.
Seðlabankastjóri segir kjarasamninga sem gerðir hafa verið jákvæða og sýna að allir hafi lagst á árarnar í baráttu við verðbólgu. Hann skilji að væntingar um vaxtalækkun hafi aukist.
Rússlandsforseti segir Rússa tilbúna í kjarnorkustríð og að kjarnorkuvopn þeirra séu miklu nútímalegri en vopn Bandaríkjanna.
Altjón er líklega á allt að sjötíu og fimm húsum í Grindavík. Náttúruhamfaratrygging segir að um 500 tilkynningar hafi borist um tjón í bænum.
Danir ætla að auka framlög til varnarmála þannig að þau verði 2,4 prósent af vergri þjóðarframleiðslu. Ætlunin er að herskylda nái til kvenna og verði lengd úr fjórum mánuðum í ellefu.
Kúabændur hafa brugðið á það ráð að koma fyrir seglum í maga nautgripa til þess að koma í veg fyrir að járnagnir sem dýrin éta valdi þeim skaða.
