Ráðherrar Sjálfstæðisflokksins svara því ekki hvort Svandís Svavarsdóttir nýtur trausts í embætti matvælaráðherra. Forsætisráðherra segir stöðu hennar óbreytta.
Dæmi eru um að grunnskólanemar sæki klámmyndir á netið og blekki menn, sem þeir eiga í samskiptum við á samfélagsmiðlum, til að kaupa þær af sér. Lögregla skoðar slíkt mál sem kom upp í Hagaskóla.
Fjármálaráðherra segir að kröfur verkalýðshreyfingarinnar hlaupi á milljörðum króna og verði gengið að þeim þurfi að draga úr útgjöldum ríkissjóðs.
Samninganefnd breiðfylkingar félaga ASÍ og Samtaka atvinnulífsins hittast á fundi hjá ríkissáttasemjara í dag. Fleiri sveitarfélög bætast í hóp þeirra sem ætla að draga úr gjaldskrárhækkunum komi til þjóðarsáttar um stöðugt verðlag.
Utanríkisráðherra Bandaríkjanna hitti ráðamenn í Ísrael í morgun. Hann lagði áherslu á nauðsyn þess að draga úr mannfalli meðal almennra borgara á Gaza. Yfir 23 þúsund hafa verið drepin á Gaza, þar af yfir hundrað síðasta sólarhringinn.
Bæjarstjórinn í Vestmannaeyjum segir að undirbúningur fyrir viðgerð á neysluvatnslögn, sem skemmdist í haust, gangi of hægt. Líklega verður ekki hægt að gera við leiðsluna fyrr en í sumar.
Líklegt þykir að umdeilt frumvarp um námugröft á hafsbotni komist í gegnum norska þingið síðdegis. Fari svo verður leyfilegt að grafa eftir málmum neðansjávar á svæði sem er stærra en Bretland. Umhverfisverndarsinnar ætla að mótmæla við þinghúsið.
Þorvaldur Örlygsson verður í framboði til formanns Knattspyrnusambands Íslands á ársþingi sambandsins í febrúar.
