Morgunvaktin

Dómur mannréttindadómstólsins, Bolungarvík og umdeildur geðlæknir

Við ræddum um dóm Mannréttindadómstóls Evrópu í talningarmálinu í Norðvestur 2021. Hann féll í gærmorgun og er íslenska ríkinu í óhag. Þingmennirnir Berglind Ósk Guðmundsdóttir Sjálfstæðisflokki og Björn Leví Gunnarsson Pírötum voru gestir okkar. Við heyrðum þeirra skoðun á málinu og því sem mögulega þarf að gera. Við ræddum líka um vantrauststillöguna sem verður lögð fram í dag og um fjármálaáætlun.

Þegar stjórnvöld tilkynntu fyrir fimm árum síðan að stefnt skyldi að því að lágmarksstærð sveitarfélaga miðaðist við þúsund íbúa ákváðu Bolvíkingar að þeir vildu ekki sameinast öðrum sveitarfélögum - heldur koma fjölda bæjarbúa upp fyrir þúsund. Í fyrra tókst það. En hvernig var farið að, hvað gekk vel og hverju er hægt að læra af? Jón Páll Hreinsson bæjarstjóri í Bolungarvík sagði okkur frá þessu, en hann ræðir málið á ársfundi Byggðastofnunar í dag.

Bandarískur geðlæknir, Bennett Braun, lést í mars síðastliðnum. Á níunda áratug síðustu aldar sérhæfði Braun sig í meðhöndlun sjúklinga sem hann taldi vera með margfaldan eða klofinn persónuleika, og varð sannfærður um að flestir skjólstæðinga hans hefðu sætt hræðilegri misnotkun í helgiathöfnum djöfladýrkenda - eða sjálf tekið þátt í slíkum athöfnum. Kenningar Braun vöktu mikla athygli á tíma þegar margir Bandaríkjamenn óttuðust satanista í hverju horni, en hann var síðar lögsóttur af fjölda fyrrverandi sjúklinga. Vera Illugadóttir rakti sögu þessa manns.

Tónlist:

Larsen, Kim - De smukke unge mennesker.

Rolling Stones, The - Tell me.

Larsen, Kim - Susan himmelblå.

Frumflutt

17. apríl 2024

Aðgengilegt til

Rennur ekki út

Umsjónarmenn eru Björn Þór Sigbjörnsson og Þórunn Elísabet Bogadóttir.