Félagið Náttúrugrið er með til skoðunar að senda erindi vegna framkvæmda til stækkunar íshella á Breiðamerkurjökli í Vatnajökulsþjóðgarði, sem greint var frá í þættinum í gær og hefur falið lögfræðingi að skoða málið. Til álita er bæði að kanna meint brot á náttúruverndarlögum og lögum um þjóðgarðinn. Þá lætur félagið einnig skoða hvort óhóflegar framkvæmdir við íshella gætu krafist þess að sótt sé um framkvæmdaleyfi, en slíkt myndi heyra undir skipulagsyfirvöld og þar með sveitarstjórn á svæðinu.
Í þættinum Þetta helst í gær var greint frá því að styr stæði um framkvæmdir sumra ferðaþjónustufyrirtækja innan Vatnajökulsþjóðgarðs við íshella í Breiðamerkurjökli sem eru gerðar í því skyni að auka aðgengi að þeim.
Í vetur hafa 195 þúsund manns heimsótt íshelli á jöklinum, og tímabilið sem farið er í íshellana hefur verið að lengjast. Eftirspurnin er mikil og í gær var rætt við Írisi Ragnarsdóttur Pedersen jöklaleiðsögumann sem gagnrýndi það sem hún kallar manngerða hella innan þjóðgarðs. Verið sé að ganga um of á náttúrúna í nafni fjöldaferðamennsku og hagnaðar. Þá var talað við Steinunni Hödd Harðardóttur þjóðgarðsvörð í Vatnajökulsþjóðgarði, sem sagði að ábendingar hefðu borist um framkvæmdir og notkun véla sem ekki væru leyfi fyrir, en að ekki hefði ekki verið gripið til neinna aðgerða.
Eftir því sem við komumst næst eru notuð logsuðutæki, keðjusagir, brothamrar og önnur verkfæri sem sum eru drifin áfram af dísilrafstöðvum sem látnar eru ganga innan þjóðgarðsins, jafnvel á sama tíma og fólk er þar að njóta náttúrunnar.
Haukur Ingi Einarsson jöklaleiðsögumaður sem skipuleggur ferðir á Breiðamerkurjökul segist vilja horfa á málin í stærra samhengi. Hann er til viðtals í þættinum. Einnig er rætt við Stephan Mantler jöklaleiðsögumann.
Í þættinum í gær var vikið að því að á Breiðamerkurjökli er ákveðin skipting í austur og vestur. Á vestursvæðinu starfa aðallega þrjú fyrirtæki, þau stærstu. Á austursvæðinu eru mörg af smærri fyrirtækjunum, en alls eru 29 fyrirtæki með leyfi til jöklaferða innan þjóðgarðsins. Stærri fyrirtækin hafa varið fjármunum og mannskap í að auka aðgengi og það eru þær framkvæmdir, sem Haukur Ingi kallar ofsafengna aðgengisvinnu, sem í raun skapa þessa skiptingu.
Eyrún Magnúsdóttir hefur umsjón með þættinum.
