Niðurstöður vísitölunnar ,,Reykjavik Index for leadership“ voru kynntar á Heimsþingi kvenleiðtoga í Hörpu. Vísitalan, sem er þróuð af Verian í samstarfi við Reykjavík Global Forum, metur samfélagsleg viðhorf einstaklinga til leiðtogahlutverka karla og kvenna í 23 ólíkum starfsgreinum. Í ljós kemur bakslag í viðhorfi til kvenna í leiðtogastörfum á heimsvísu. Við ræddum þessi mál við Hönnu Birnu Kristjánsdóttur stjórnarformann heimsþings kvenleiðtoga í þættinum.
Hlaðvarpsdrottningarnar Ólöf Skaftadóttir og Kristín Gunnarsdóttir mæta til okkar á eftir en þær halda úti podcastinu Komið gott þar sem þær fara yfir hið pólitíska svið á léttu nótunum. Við spurðum þær út í hlaðvarpið og hasarinn í aðdraganda kosninga á sjötta tímanum.
Í dag miðvikudaginn 13.nóvember er haldið upp á dag íslensku brauðtertunnar og þeirri dagsetningu verður án alls vafa haldið til haga hér eftir. Þetta er nefnilega, vel að merkja, sama dagsetning og í Svíðþjóð þar sem haldið er upp á Smörgåstårtans dag. Brauðtertan hefur vitaskuld verið órjúfanlegur hluti að okkar menningu um árabil, eiginlegur þjóðarréttur og fastagestur í öllum góðum veislum. Við í Síðdegisútvarpinu héldum að sjálfssögðu upp á daginn og fengum til okkar Friðrik V sem veit allt um það hvernig á að gera góða brauðtertu en hann er einn þeirra sem á uppskriftir í nýútkominni brauðtertubiblíu.
MEME vikunnar var á sínum stað þegar Atli Fannar Bjarkason mætti til okkar.
Vísindamenn við Gervigreindarsetur Háskólans í Reykjavík og Vitvélastofnun Íslands hlutu tvenn verðlaun fyrir rannsóknir sínar á alhliða gervigreind (e. general machine intelligence) á alþjóðlegu vísindaráðstefnunni Artificial General Intelligence í Seattle í Bandaríkjunum á dögunum. Dr. Kristinn R. Þórisson, prófessor við tölvunarfræðideild HR, fer fyrir rannsóknarhópnum en í grunninn ganga rannsóknir hópsins þannig út á að kenna tölvum að læra nýja hluti upp á eigin spýtur, sem er ákveðin bylting í gervigreind. Við forvitnuðumst um þetta.
Þessa dagana er haldið heimsmeistaramót í kraftlyftingum í Ljónagryfjunni í Reykjanesbæ. 20 keppendur frá 5 löndum eru skráðir til leiks.
Föstudagurinn 15. nóvember verður special Olympics dagur samhliða mótinu en þá munu þrjár systur þær Hulda, María og Sigríður Sigurjónsdætur frá Mið-Mörk keppa í kraftlyftingum. Og við settum okkur í samband við Huldu sem er á fullu að æfa fyrir mótið.
