Við fáum til okkar í Síðdegisútvarpið í dag Guðrúnu Karls Helgudóttur nýkjörinn biskup Íslands en hún sest niður með okkur hér strax að loknum fimm fréttum og við fáum okkur kaffibolla með henni á þessum tímamótum.
Það eru aðeins örfáir dagar þar til landsmenn mæta á kjörstað og kjósa sér nýjan forseta. Það lítur allt út fyrir að þetta verði mest spennandi forsetakosningar frá upphafi og við ætlum að fá þær Þorbjörgu Sigríði Gunnlaugsdóttur þingmann Viðreisnar og Ólöfu Skaftadóttur fyrrverandi ritstjóra Fréttablaðsins til okkar til að ræða frambjóðendurna, kosningabaráttuna og auðvitað möguleg kosningaúrslit.
Vegagerðin hefur boðið út hönnun borgarlínunnar eftir Suðurlandsbraut og Laugavegi en um er að ræða forhönnun á einum verkhluta og verkhönnun á alls sex verkhlutum. Við ætlum að heyra í Ásdísi Kristinsdóttur forstöðumanni verkefnastofu borgarlínu og fá hana til að skýra þetta út fyrir okkur, hvað þetta þýði, hvað felist í verkinu og hvernig svona útboð fari fram.
Bárður Örn Gunnarsson, framkvæmdastjóri Lava Center hefur ásamt öðrum ferðaþjónustuaðilum í Rangárþingi fundað með ráðamönnum þar um aðgerðir sem eiga að efla vetrarferðaþjónustu á svæðinu til framtíðar. Einnig er lagt upp með að þessi vinna geti einnig bætt lífskjör íbúa og stuðlað að hagræðingu í rekstri sveitarfélaganna. Bárður ætlar að koma til okkar í Síðdegisútvarpið á eftir og segja okkur betur frá þessum spennandi pælingum sem eru að eiga sér stað í Rangárþingi.
Í kvöld verður aðalfund Liverpoolklúbbsins á Íslandi haldinn í Minigarðinum og þar á meðal annars að kjósa nýjan formann. Við heyrum í fráfarandi formanni Braga Brynjarssyni og spyrjum hann aðeins út í þennan merka klúbb og þennan mikla áhuga landsmanna á Liverpool.
Við lásum um það í Morgunblaðinu í dag að ekki sé gert ráð fyrir nýjum þyrlupalli, hvort sem er á jörðu eða á þaki, í neinum drögum nýrrar viðbyggingar við Sjúkrahúsið á Akureyri, SAk, sem reisa á sunnan spítalans á lóðinni þar sem núverandi þyrlupallur er. Þetta hefur vakið upp einhverjar spurninga og og línunni hjá okkur er Hildigunnur Svavarsdóttir forstjóri Sjúkrahússins á Akureyri.
