ASÍ, BSRB og ÖBÍ stóðu að málþingi um jafnrétti í heilbrigðisþjónustu í dag. Einn þeirra sem hélt þar erindi er Rúnar Vilhjálmsson, prófessor í félagsfræði á heilbrigðisvísindasviði Háskóla Íslands, en hann hefur verið að rannsaka þróun þessara mála hér á landi. Og við spurðum hvar stöndum við ? Rúnar fór yfir það með okkur.
Endurtekið eru nýir þættir á RÚV sem fjalla um hringrásarhagkerfið, þar sem hlutir og hráefni fara í hring og eins manns rusl verður annars fjársjóður. Umsjónamenn þáttanna eru Sigríður Halldórsdóttir og Freyr Eyjólfsson. Þau gáfu okkur smjörþefinn í þættinum.
Fjármögnunarendi samgöngusáttmálans hefur ekki verið undirbúinn nógu vel að mati Magnúsar Arnar Guðmundssonar, formanns bæjarráðs Seltjarnarnesbæjar og stjórnarmanns í Strætó. Umræðan um sáttmálann er núna að byrja í sveitarfélögunum og má leiða að því líkum að þetta verði í deiglunni næstu vikurnar. Magnús segir að það sé mat hans og fleiri sveitarstjórnarmanna á Seltjarnarnesinu að óábyrgt sé að skrifa undir samninginn eins og hann er í dag, að minnsta kosti án fyrirvara. Við fórum yfir þessi mál með Magnúsi Erni í Síðdegisútvarpinu.
Íslandsdeild Amnesty er 50 ára og af því tilefni verður margt í gangi nú um helgina. Anna Lúðvíksdóttir framkvæmdastjóri kíkti í kaffi til okkar og við spyurðum hana út í starfssemina og fengum að vita hvernig þau ætla að halda upp á stórafmælið.
Í tilefni þess að 30 ár eru síðan að samningur um Evrópska efnahagssvæðisins (EES) tók gildi, og veitti Íslandi aðgang að auknum tækifærum til samstarfs í Evrópu, mun Evrópurútan fara hringinn um landið í september. Við ætlum að forvitnast um þessa hringferð á eftir þegar Eva og Aðalheiður frá Rannís komu til okkar.
Tölvuleikir eru gróskumikill og litskrúðugur geiri menningarlífsins þar sem tónlistin leikur oftar en ekki mikilvægt hlutverk. Annað kvöld verður Sinfó með tónleika í Hörpu þar sem eingöngu verður leikin tölvuleikjatónlist. Kórstjóri tónleikanna er Magnús Ragnarsson, var á línunni.
