Síðdegisútvarpið

Arnar Þór á Grillinu, netsala áfengis, Valsmenn í Grikklandi og brimbrettakappar stíga ölduna.

Síðasti leikur karlaliðs Vals í handbolta á þessari leiktíð er á morgun. Þá mætir liðið Olympiacos í Grikklandi í seinni leik liðanna í úrslitum Evrópubikarsins. Grikkirnir sóttu Valsmenn heim á Hlíðarenda um síðustu helgi þar sem að Valur hafði betur með fjórum mörkum. RÚV sýnir að sjálfssögðu beint frá leiknum á morgun klukkan 17:00. Valsmenn komu til Aþenu í gær og þeirra á meðal er Vignir Stefánsson hornamaður sem var á línunni og sagði okkur hver staðan á liðinu væri og hitaði upp fyrir leikinn.

Síðdegisútvarpið heldur áfram að bjóða forsetaframbjóðendum í heimsókn og sá sem við ætlum að grilla með að þessu sinni er Arnar Þór Jónsson sem mætir galvaskur til okkar í góða veðrinu og við byrjum að bleyta í kolunum hér rétt fyrir fimm-fréttir.

Aldan okkar allra er yfirskrift herferðar Brimbrettafélags Íslands sem undirstrikar mikilvægi þess að berjast fyrir framtíð brimbrettamenningar á Íslandi. Félagið hefur átt sér bækistöð við strendur Þorlákshafnar þar sem besta aldan á landinu til brimbrettaiðkunar leynist. Nú er svæðið í hættu sökum framkvæmda og þeir Oliver Hilmarsson og Egill Örn Bjarnason mæta til okkar og stíga væntanlega ölduna.

Hag­kaup opnar net­versl­un með áfengi í næsta mánuði. Samkvæmt Sigurði Reynaldssyni framkvæmdastjóra Hagkaups hafði ætlunin verið sú að bíða átekta og fá skýrari ramma frá stjórnvöldum varðandi þessa starfsemi en sá rammi hafi aldrei komið. Hagkaup bætist þar með í hóp fjölmarga fyrirtækja sem selja áfengi á netinu. Áfengi og sala þess hefur verið vinsælt umræðuefni á þingi frá byrjun síðustu aldar og er Vilhjálmur Árnason þingmaður Sjálfstæðisflokksins einn þeirra sem hefur áður lagt til breytingar á lögum sem myndu heimila fleirum en ÁTVR að sjá um smásölu áfengis.

Frumflutt

24. maí 2024

Aðgengilegt til

24. maí 2025