Síðdegisútvarpið

Kolefnisbinding Running Tide, kammertónlist, ný starfsemi í Vinabæ og EM í fótbolta.

Tónlistarhátíðin Við Djúpið er árleg kammertónlistarhátíð sem haldin er á Ísafirði og nær aftur til sumarsins 2003. Við Djúpið hefst nú á sjálfan þjóðhátíðardaginn og inniheldur dagskráin gnægt af spennandi tónleikum, matarupplifunum og náttúruskoðun svo eitthvað sé nefnt. Við hringdum vestur í djúp til Greips Gíslasonar hátíðarhaldara.

Það eru eflaust margir borgarbúar og mögulega þverskurður þjóðarinnar allrar sem þekkir Vinabæ í Skipholti í Reykjavík. Þar var spilað Bingó í árafjöld allt til ársins 2022 en áður var þar kvikmyndahúsið Tónabíó. Nú er aftur komið líf í þetta fornfræga félagsheimili og við heyrðum í Sigurði Pétri Snorrasyni sem stendur fyrir nýju lífi hússins og spyrjum hvað standi til.

Á inniskónum er skemmtileg yfirskrift nýrrar spjalltónleikaraðar píanóleikara Magnúsar Jóhanns þar sem hann fær til sín gesti víðsvegar að úr tónlistarlífinu í Menningarhúsið Hannesarholt. Þar mun Magnús setja tónlist viðmælenda sinna í nýjan búning og úr mun verða áhugaverður bræðingur. Gestur hans í kvöld verður Bjarni Daníel Þorvaldsson sem kemur úr alla annarri tónlistarsenu en Magnús og við fengum þá hér í stutta heimsókn til að forvitnast örlítið meira um inniskóna þeirra.

Nú fer að bresta á með fuðrandi fótboltaveislu, EM karla í fótbolta verður sparkað af stað nánast eftir að útsendingu Síðdegisútvarpsins lýkur og opnunarleikurinn er á milli gestgjafanna Þýskalands og nágranna okkar Skota. Sérfræðingateymi íþróttadeildar er á haus að leggja lokahönd á undirbúninginn og við stálum Gunnari Birgissyni sem mun lýsa opnunarleiknum í örstutt spjall.

Running Tide er alþjóðlegt loftslagsfyrirtæki á sviði sjávarheilsu líkt og segir í kynningartexta. Fyrirtækið bindur kolefni í sjó með því að sökkva kolefnisflothylkjum úr timbri, kalksteini og þörungum í djúpsjó og hraða þannig náttúrulegum ferlum hafsins til að binda kolefni og snúa við súrnun sjávar. Sagt var frá því í miðlum að fyrirtækið hefði snögglega hætt allri starfsemi á dögunum en að­gerð­ir þeirra umbreytt­ust í allt ann­að en lagt var upp með. Þetta kemur m.a. fram í umfangsmkilli grein í Heimildinni og blaðamaður þess miðils, Bjartmar Oddur Þeyr Alexandersson, skýrði þetta áhugaverða mál fyrir okkur

Frumflutt

14. júní 2024

Aðgengilegt til

14. júní 2025