Nú standa framkvæmdir yfir á Skarfabakka í Sundahöfn. Þar er verið að byggja nýja farþegamiðstöð fyrir farþega skemmtiferðaskipa. Fyrsta skóflustungan var tekin í mars á þessu ári og áætlað er að hún verði tekin í notkun árið 2026. Það má segja að miðstöðin verði á stærð við fótboltavöll og kemur hún til með að geta sinnt um 4000 farþegum allan ársins hring. Þórdís Lóa Þórhallsdóttir forseti borgarstjórnar og stjórnarformaður Faxaflóahafna kemur til okkar á eftir og ræðir þessa framkvæmd við okkur og þau tækifæri sem í henni felast.
Seinni þáttur Hraðfrétta X24 verður sýndur á RÚV í kvöld en í þáttunum koma Benni og Fannar saman á ný í aðdraganda forsetakosninga til að hjálpa þjóðinni að velja nýjan forseta. Benedikt Valsson ætlar að kíkja til okkar í kaffi á eftir og við hitum aðeins upp fyrir þáttinn og auðvitað kosningarnar á laugardaginn.
Vistkjöt, tómatblöð, þari og skordýraprótein eiga það sameiginlegt að verða á milli tannanna hjá gestum málþings í Hörpu föstudaginn 31. maí undir yfirskriftinni Hvað verður í matinn? Á málþinginu, sem er á vegum Matís, verður fjallað um framtíð matvælaframleiðslu á Íslandi og Margrét Geirsdóttir, verkefnastjóri, segir okkur lítillega hvar þar verður helst á boðstólum.
Atli Fannar Bjarkason mætir til okkar eins og alla fimmtudaga og fer í MEME vikunnar með okkur.
Hin fornfræga plötubúð Tónspil í Neskaupstað lagði upp laupana fyrir nokkru og nú hefur Blús, rokk og jazzklúbburinn á Nesi (BRJÁN) komið sér fyrir í húsi Tónspils við Hafnarbraut og opnar formlega í kvöld nýtt tónleika- og viðburðahús. Guðmundur Höskuldsson er formaður BRJÁN og verður á línunni.
Líkt og komið hefur fram í fréttum er farið að bera á eldsneytisskorti í Færeyjum og úrval í hillum matvöruverslana hefur minnkað mikið vegna verkfalls nokkurra félaga. Erfitt hefur reynst að finna lausn á deilunni. Við ætlum að heyra í Baldvini Harðarsyni sem býr og starfar í Færeyjum og fáum það nýjasta af stöðunni þar.
