Umsjón: Hulda G. Geirsdóttir og Kristján Freyr Halldórsson.
Við komum víða við í þættinum í dag að venju, spjölluðum m.a. við konu sem farið hefur í göngutúr í öllum þéttbýlispóstnúmerum landsins. Áslaug Björt Guðmundardóttir hefur verið á þessu ferðalagi frá 2020 og hún kíkTU til okkar í spjall um þetta skemmtilega verkefni sitt.
Flestar íslenskar bækur koma út fyrir jól, en það koma líka út bækur á sumrin enda njóta margir þess að lesa í sumarfríinu. Við ræddum glænýja íslenska glæpasögu sem ber titilinn Utan garðs og fengum til okkar höfundinn Unni Lilju Aradóttur.
Á morgun verður boðið upp á fræðslugöngu í Grasagarðinum í Reykjavík þar sem Svanhildur Björk Sigfúsdóttir, garðyrkjufræðingur ætlar að kynna tré og runna sem njóta sín vel í heimagörðum. Þar kemur ýmislegt til, svo sem vaxtarlag og blómskrúð, og við tókum smá forskot á sæluna og fengum Svanhildi til okkar í smá garðyrkjuspjall.
Aðgengi að gosstöðvunum var opnað aftur eftir hádegi í dag. Við veltum fyrir okkur hvort fólk streymir að og slógum á þráðinn til Boga Adolfssonar formanns björgunarsveitarinnar Þorbjarnar, sem staddur var á svæðinu.
Eftir 10 ára þögn mun hljómsveitin Botnleðja snúa aftur og það með stæl, því hún ratar rakleiðis í Eldborg í Hörpu til að hita upp fyrir bandarísku hljómsveitina Pavement. Sveitin sú á sér marga áhangendur hér heima en hún er ein af þeim áhrifamestu sem sprottið hafa upp úr bandarísku neðanjarðarsenunni síðustu áratugi. Margir fögnuðu þeim tíðindum er Botnleðja bættist í dagskrána, en liðsmenn hennar þekkja tónlist Pavement vel. Við fengum þá Heiðar Örn Kristjánsson og Ragnar Pál Steinsson í heimsókn.
En við byrjuðum á allt öðru. Flest tengjum við skötuát við Þorláksmessu, en ekki hásumar. Ásmundur Friðriksson hefur hins vegar boðið upp á skötumessu að sumri við miklar vinsældir undanfarin ár og messan í ár verður á miðvikudaginn kemur. Ásmundur var á línunni.
Tónlist:
GDRN - Parísarhjól.
PROCLAIMERS - I'm on my way.
FOOLS GARDEN - Lemon Tree.
VÖK - Lost in the weekend.
ELLEN KRISTJÁNSDÓTTIR - Veldu stjörnu (ft. John Grant).
WARMLAND - Overboard.
LANGI SELI OG SKUGGARNIR - Hviss Bamm Búmm.
BOTNLEÐJA - Fallhlíf.
PAVEMENT - Range Life.
TOVE LO - No one dies from love.
