79. allsherjarþing Sameinuðu þjóðanna í New York stendur nú sem hæst. Þórdís Kolbrún Reykfjörð Gylfadóttir utanríkisráðherra hélt utan til Bandaríkjanna á mánudaginn til að taka þátt í ráðherraviku sem haldin er árlega í upphafi allsherjarþingsins, en hún flytur svo ávarp í sjálfu þinginu á laugardaginn. Við heyrum í Þórdísi Kolbrúnu eftir smá stund.
Nú eru allir að tala um hvað við getum gert fyrir unga fólkið okkar í ljósi liðinna atburða. Þetta getum við gert: Gripið ungmenni í vanlíðan snemma og hjálpað þeim með hlustum og handleiðslu fagaðila!
Svona hefst færsla leikkonunnar Unnar Aspar á Facebook í vikunni. Hún er ein þeirra sem staðið hefur símavaktina fyrir BERGIÐheadspace í að safna bergrisum. BergiðHEADSPACE er stuðnings- og ráðgjafasetur fyrir ungt fólk á aldrinum 12-25 ára. Markmið Bergsins er að bjóða upp á lágþröskuldaþjónustu og enga biðlista. Unnur Ösp Stefánsdóttir kemur á eftir.
Íslensk kvikmyndagerð er í hávegum höfð á Alþjóðlegu kvikmyndahátíðinni í Reykjavík sem hefst í Háskólabíói á fimmtudag í næstu viku, þann 26. september og stendur yfir til 6. október. Úrvalið af leiknu efni og heimildarmyndum, eftir íslendinga eða um Ísland, hefur raunar aldrei verið meira en á RIFF en hátíðin er nú haldin í 21. sinn.
Opnunarmyndin nefnist Elskling eða Elskuleg og er eftir Lilju Ingólfsdóttur en þetta er fyrsta mynd þessarar norsk/íslensku leikstýru sem kemur til okkar í Síðdegisútvarpið i dag.
Sigríður Halldórsdóttir og Freyr Eyjólfsson umsjónarmenn þáttanna Endurtekið mæta til okkar á eftir með uppskrift í rassvasanum og segja okkur frá efni þáttar kvöldsins. Þar munum við meðal annars sjá hvernig stjörnukokkur slær upp veislu úr hráefnum sem hefðu annars endað í ruslinu og við hittum ruslara sem dýfa sér í gáma í leit að mat.
Ofhugsun er glæný uppistandssýning og jafnframt frumraun Ásgeirs Inga Gunnarssonar í uppistands senunni á Íslandi.
Sýningin gefur innsýn í hugarheim næstum 30 ára leikara og verðandi föður sem hugsar mjög mikið um lífið og tilveruna eða réttar sagt ofhugsar hlutina. Ásgeir kemur til okkar í lok þáttar.
Mikið hefur verið rætt og ritað um íslenska skólakerfið og svo virðist sem sífelldar breytingar á námsmati, námskrá, niðurfellingu samræmdra prófa, lakar niðurstöður í Pisa könnunum, og að drengir eiga erfiðara með að lesa sér til gagns, og notkun samfélagsmiðla hefur ekki hjálpað til í að skapa sátt um skólakerfið. Í grein sem Kristján Hrafn Guðmundsson fyrrverandi grunnskólakennari og faðir þriggja barna skrifaði á Vísi í geir og ber yfirskriftina Hvar er grunnskólinn, veltir Kristján því fyrir sér á hvaða leið íslenski grunnskólinn sé og við fáum hann til okkar á eftir til að svara því.
