Innviðaráðuneytið er langt komið með endurskoðun á samgöngusáttmálanum. Hann var tekinn til endurskoðunar eftir að í ljós kom að útgjöld yrðu umtalsvert hærri en upphaflega stóð til. Engu að síður eru leiðtogar ríkisstjórnarflokkanna mikið í mun að sáttmálinn verði kláraður. Davíð Þorsteinsson hjá Betri samgöngum kemur til okkar og segir okkur hver staðan er í þessu gríðarstóra samgöngumáli.
Við ætlum að hringja norður á Akureyri í Sigrúnu Steinarsdóttur sem hefur síðustu tíu ár rekið facebook- hópinn Matargjafir á Akureyri og nágrenni. Við höfum áður rætt við Sigrúnu í Síðdegisútvarpinu en starfsemi matargjafanna hefur falið í sér að að láta fólk fá mat sem hefur ekki sjálft tök á að kaupa mat auk þess sem meðlimir hópsins hafa getað sótt um að fá mataraðstoð í formi Bónuskorts. Nú hefur Sigrún ákveðið að hætta með Matargjafir á Akureyri og nágrenni en sú ákvörðun hefur ekki reynst henni auðveld. Við heyrum í Sigrúnu á eftir.
Urðun hefur minnkað eftir að nýtt flokkunarkerfi var tekið í gagnið hjá Sorpu. Við fáum blaðamanninn Bjartmar Alexandersson á Heimildinni til okkar en hann hefur skrifað mikið um endurvinnslu á Íslandi og hlaut rannsóknarblaðamannverðlaunin fyrir fréttir sínar um meðferð mjólkurferna hér á landi.
Kvikmyndin Einskonar ást var frumsýnd við frábærar undirtektir í Smárabíói síðastliðið miðvikudagskvöld. Myndin. sem er rómantísk gamanmynd í nútímalegri kantinum, varpar ljósi á sífellt flóknara ástarlíf ungmenna í Reykjavík nútímans. Einskonar ást er að fara í almennar sýningar í kvöld og af því tilefni ætlum við að fá til okkar leikstjóra myndarinnar, Sigurð Anton Friðþjófsson og Kristrúnu Kolbrúnardóttur aðalleikkonu myndarinnar.
Hvernig koma golfvellir undan vetrinum og hvenær mega golfarar búast við að komast á flötina? Þetta er spurning sem aðeins iþrótta-valla-yfirborðs-tækni-fræðingar geta svarað. Já, þið heyrðuð rétt, iþrótta-valla-yfirborðs-tækni-fræðingurinn Bjarni Þór Hannesson kemur til okkar og fer yfir golfsumarið og mögulega lengsta starfstitilinn í íslensku máli.
Klassíski krakkadagurinn verður haldinn í Hörpu á morgun og í fyrsta sinn í íslenskri tónlistarsögu, bjóða tvær sinfóníuhljómsveitir upp á dagskrá fyrir börn og fjölskyldur. Sú sem veit allt um málið heitir Ása Berglind Hjálmarsdóttir, verkefnastjóri dagskrágerðar hjá Hörpu.
