Talsverð reiði er í samfélaginu vegna ákvörðunar stjórnvalda um að vísa hátt í þrjú hundruð umsækjendum um alþjóðlega vernd úr landi. Um fjórðungi þeirra átti að vísa aftur til Grikklands en alþjóðastofnanir á borð við Rauða krossinn hafa lagst gegn því af mannúðarástæðum. Ástandið er ekki sagt skárra í Ungverjalandi en um 20 manns á að vísa aftur þangað. Í þáttinn komu þau Jón Gunnarsson dómsmálaráðherra og Helga Vala Helgadóttir þingmaður Samfylkingarinnar.

Hnúðlax er mun útbreiddari og finnst í meira magni í íslenskum ám en áður var talið. Ekki er vitað hvort að fjölgun hnúðlaxa eigi eftir að bitna á öðrum tegundum eða geti orðið hrein viðbót við fánu laxfiska. Kastljós ræddi við Guðna Guðbergsson, sviðsstjóra hjá Hafrannsóknarstofnun.

Heimurinn hringsnýst í orðsins fyllstu merkingu í sýningunni Room for one Live sem verður frumsýnd í Borgarleikhúsinu á fimmtudag. Potturinn og pannan í sýningunni er sviðslistamaðurinn Kristján Ingimarsson sem sló í gegn á heimsvísu með verkinu Blam! fyrir áratug. Kastljós fór á æfingu.