Kastljós í kvöld er helgað blaðamennsku og sjávarútvegi - í dag og á níunda áratugnum. Lögreglustjórinn á Norðurlandi eystra hefur boðað fjóra blaða- og fréttamenn á þremur fjölmiðlum til yfirheyrslu, að því er virðist vegna gruns um að þau hafi brotið lög með umfjöllun um svokallaða skæruliðadeild Samherja. Halldóra Þorsteinsdóttir héraðsdómari ræðir um lagalegan grundvöll lögsókna á hendur blaðamönnum vegna umfjöllunarinnar þeirra og heimildanotkunar og Þórhildur Sunna Ævarsdóttir, þingmaður Pírata, ræddi svigrúm fjölmiðla með hliðsjón af lögum um friðhelgi einkalífsins.

Boðun blaðamannanna í skýrslutöku gerist daginn eftir að síðasti þáttur Verbúðarinnar fór í loftið, en þar er einmitt fjallað um tilurð kvótakerfisins, uppgang útgerðarfyrirtækis, og tilraunir fjölmiðla til að fjalla um þá þróun. Daði Már Kristófersson hagfræðiprófessor og varaþingmaður Viðreisnar og Ragnheiður Kristjánsdóttir sagnfræðiprófessor, ræða um sannleiksgildi Verbúðarinnar og áhrif hennar á söguskoðun þjóðarinnar.