Fjöldi foreldra í Reykjavík bíður nú eftir leikskólaplássi. Reykjavíkurborg boðaði aðgerðir í leikskólamálum í ágúst þar sem meðal annars var kveðið á um að hækka niðurgreiðslur til dagforeldra? En hver er staðan þar á bæ? Rúmlega 80 dagforeldrar eru starfandi í Reykjavík og hefur farið fækkandi. Halldóra Björk Þórarinsdóttir, formaður Barnsins, félags dagforeldra í Reykjavík, og Anna Steinunn Þórhallsdóttir, formaður Barnavistunar, segja í Kastljósi fækkunina meðal annars stafa af áformum Reykjavíkurborgar um að fjölga leikskólaplássum - sem hafi hins vegar ekki gengið eftir og því bætt gráu ofan á svart.

Andrej Kúrkov, þekktasti samtímahöfundur Úkraínu, hlaut Alþjóðleg bókmenntaverðlaun Halldórs Laxness. Kúrkov er landflótta, eins og milljónir landa sinna, en hefur haldið dagbók frá því í aðdraganda innrásarinnar sem gefur áhrifaríka innsýn inn í daglegt líf Úkraínubúa á stríðstímum. Hann segir í rauninni aðeins tvo kosti í stöðunni, annað hvort verði Úkraína áfram frjáls og evrópsk eða ríki líði einfaldlega undir lok.