Mál fimmenninganna sem Vítalía Lazareva hefur sakað um kynferðisbrot og ósæmilega hegðun hefur vakið upp spurningar um fyrirtækjamenningu hér á landi. Einum hefur verið sagt upp, aðrir vikið til hliðar og hinir farið í leyfi. Þótt viðbrögðin séu afdráttalausari en oft hafa fyrirtækin sem eiga í hlut samt sem áður verið gagngrýnd fyrir að hafa ekki brugðist við fyrr en nú, en ekki í október þegar Vítalía birti fyrst frásögn sína á samfélagsmiðlum. Sigríður Dögg Auðunsdóttir ræddi við Magnús Harðarson, forstjóra kauphallarinnar, sem segir að stjórnir hefðu átt að sýna meira frumkvæði í þessu máli. Einnig var rætt við Ásdísi Eir Símonardóttur, formann Mannauðs, félags fólks í mannauðsmálum, um hlutverk, úrræði og takmarkanir mannauðsstjóra í málum sem þessum.

Hótel Saga hefur tekið á móti sínum síðasta gesti. Hótelið varð gjaldþrota í haust og eftir nokkra óvissu keyptu ríkið og Félagsstofnun stúdenta húsið fyrir starfsemi háskólans og stúdentaíbúðir. Verið er að búa húsið undir nýtt hlutverk en góðkunningjar Hótels Sögu blésu í glæður minninganna við Hagatorg.