Ferjusiglingar yfir Breiðafjörð eru í uppnámi vegna tíðra bilana í ferjunni Baldri, vélarvana um helgina í annað sinn á rúmu ári. Úttektir sýna að auki að öryggi sé ábótavant og innviðaráðherra segir aðstæður óboðlegar. Jakob Björgvin Sigríðarson Jakobsson, bæjarstjóri í Stykkishólmi, kallar eftir tafarlausum aðgerðum fyrir veturinn. Ef ekki verði fengin ný ferja til bráðabirgða þurfi að auka viðbúnað í Stykkishólmi.

Blóðbankinn þarf um 12 þúsund blóðgjafir á ári hverju til að mæta þörfum samfélagsins eða um 250 blóðgjafir í viku hverri. Reglulega þarf að kalla sérstaklega eftir blóðgjöfum þegar birgðastaðan er lág enda mikilvægt að sjúklingar geti fengið blóð með litlum fyrirvara. Kastljós fékk að skoða starfsemi Blóðbankans og fræðast um það hvað gert er við blóðið áður en það er notað.

Ljósmyndasýningin Mæðgur eftir Gunnlöð Jónu Rúnarsdóttur stendur yfir í Borgarbókasafninu í Spönginn. Á sýningunni eru myndir af mæðgum; móðirin er alltaf íslensk og dóttirin eða dæturnar eiga feður af erlendum uppruna. Í Pop up galleríinu á Hafnartorgi halda listamennirnir Hrafnkell Sigurðsson, Stefán Jónsson og Óskar Jónasson myndlistarsýninguna Arctic Creatures, þar sem þeir sjást í ögrandi stellingum klæddir úrgangi sem rak á fjörur landsins