Óbein áhrif innrásar Rússa í Úkraínu eru óvíða meiri en í Finnlandi en sögulegar, landfræðilegar og pólitískar ástæður hafa valdið því að Finnar höfðu þar til stríðið í Úkraínu hófst valið að sýna ákveðið hlutleysi í samskiptum við Rússa. Finnar hafa staðið utan NATÓ og hefur meirihluti þjóðarinnar um áratugaskeið verið á einu máli um að hagsmunum Finna sé betur borgið utan þess. Þangað til núna. Í fyrsta sinn í sögu varnarbandalagsins hefur myndast meirihluti fyrir því að Finnar gangi í NATÓ. Sigríður Dögg reifar samskipti Rússlands og Finnlands í ljósi sögunnar og ræddi við Ann-Sofie Stude, sendiherra Finnlands á Íslandi.

Íbúum á Vestfjörðum hefur verið að fjölga á ný eftir fólksfækkun undanfarna áratugi og atvinnulíf að glæðast. Um helgina auglýsti Arnarlax t.d. 30 störf á sunnanverðum Vestfjörðum. Framan af var borð fyrir báru og nóg til af húsnæði en nú er stakkurinn að þrengjast. Bergsteinn ræddi við Sigríði Ó. Kristjánsdóttur, framkvæmdastjóra Vestfjarðastofu, um helstu úrlausnarefnin tengd fjölgun íbúa á Vestfjörðum.

Systurnar Sísi, Beta og Elín stóðu með pálmann í höndunum þegar lagið Með hækkandi sól bar sigur úr bítum í úrslitum Söngvakeppninnar um helgina. Þær verða því fulltrúar Íslands í Eurovision í ár en keppnin verður haldin í Tórínó á Ítalíu í Maí. Guðrún Sóley ræddi við hinar lagvissu-systur.