Gísli Finnsson hefur verið fastur á sjúkrahúsi í Torrevieja í rúmlega mánuð. Ættingjar Gísla höfðu upp á honum eftir langa leit en þá hafði hann legið í dái á sjúkrahúsi í viku með mikinn heilaskaða. Sjúkratryggingar Íslands vilja ekki borga fyrir flutning hans til Íslands og ættingjar hans leita nú leiða til að koma honum heim. Baldur Brynjar Þórisson, mágur Gísla, er úti í Torrevieja. Kastljós ræddi við hann.

Hvernig eiga fyrirtæki og stofnanir að bregðast við þegar upp koma mál sem tengjast kynferðislegri áreitni? Dagný Aradóttir Pind, lögfræðingur BSRB, ræddi um mikilvægi þess að hafa skýra ferla og að ábyrgð á málinu væri ekki velt yfir á þolendur.

Fáir ef nokkrir bæir á Íslandi hafa tekið jafn miklum breytingum vegna uppgangsins í ferðaþjónustu og Vík í Mýrdal. Á síðastliðnum áratug hefur íbúafjöldinn tvöfaldast og um helmingur bæjarbúa er af erlendu bergi brotinn. Eftir kosningar var sérstakt enskumælandi ráð sett á laggirnar í Mýrdalshreppi, sitt fyrsta sinnar tegundar. Kastljós leit við í Vík.