Sala Símans á Mílu til franska sjóðsstýringafyrirtækisins Ardian var samþykkt í dag eftir að samkomulag náðist við Samkeppniseftirlitið. Salan hefur verið gagnrýnd, meðal annars vegna þjóðaröryggissjónarmiða, þar sem mikilvægir fjarskiptainnviðir eru nú í erlendri eigu. Orri Hauksson ræddi um söluna og framtíð Símans.

Gæða- og eftirlitsstofnun velferðarmála gaf í gær út svarta skýrslu sem sýnir sterkar vísbendingar um að börn sem dvöldu á vistheimilinu Varpholti og síðar Laugalandi á árunum 1997 til 2007 hafi sætt alvarlegu andlegu ofbeldi. Þá lýsti stór hluti þeirra sem rætt var við líkamlegu ofbeldi og áreitni, meðal annars frá hendi forstöðumannsins á þeim tíma, Ingjalds Ástþórssonar. Óðinn Svan Óðinsson, fréttamaður ræddi við Dagnýju Rut Magnúsdóttur sem dvaldi á heimilinu.