Skortur á hjúkrunarrýmum fyrir aldraða hefur verið viðvarandi í áratugi, eins fjallað var um í Kveik á þriðjudag. Fyrir hálfum mánuði var þó kynntur nýr samningur Sjúkratrygginga Íslands við Samband íslenskra sveitarfélaga og Samtök fyrirtækja í velferðarþjónustu, sem er ætlað að bæta úr stöðunni. María Fjóla Harðardóttir, forstjóri Hrafnistu og stjórnarformaður Samtaka fyrirtækja í velferðarþjónustu, og Berglind Magnúsdóttir, sálfræðingur og skrifstofustjóri öldrunarmála á velferðarsviði Reykjavíkurborgar, fóru yfir stöðuna.

Martin Ingi Sigurðsson svæfinga- og gjörgæslulæknir er í Rúanda á vegum bandarísku hjálparsamtakanna Team Heart, sem sinna hjartalækningum í samvinnu við heilbrigðisráðuneyti landsins. Teymið sem Martin er hluti af fer nokkrum sinnum á ári til þessa smáa Afríkuríkis, þar sem alvarlegir hjartasjúkdómar af völdum streptókokka eru útbreitt vandamál. Kastljós ræddi við Martin.