Stéttarfélög innan Alþýðusambandsins hafa slitið kjaraviðræðum við Samtök atvinnulífsins. Þau segja viðræðurnar árangurslausar.
Stjórnvöld ætla að bjóðast til að kaupa íbúðarhúsnæði í Grindavík og taka yfir þau íbúðalán sem á eignum hvíla, sé eftir því óskað. Þórdís Kolbrún Reykfjörð Gylfadóttir fjármálaráðherra vonast til að málið verði afgreitt fyrir mánaðamót. Arnar Björnsson ræddi við hana. Páll Valur Björnsson, íbúi í Grindavík segist nokkuð sáttur við áformin.
Síðustu merki um eldvirkni í gosinu á Reykjanesskaga sáust um áttaleytið í morgun. Sigríður Magnea Óskarsdóttir, náttúruvársérfræðingur segir allt með kyrrum kjörum síðan. Gréta Sigríður Einarsdóttir talaði við hana.
Lokið var síðdegis við að tengja heitavatnslagnir sem fóru í sundur þegar hraun rann yfir þær í gær. Allt að tvo sólarhringa gæti tekið að ná fullum þrýstingi á öllum svæðum, sagði Kristinn Harðarson, framkvæmdastjóri framleiðslusviðs hjá HS Orku, í viðtali við Grétu Sigríði Einarsdóttur.
Margir af íbúum Suðurnesja eru enn heitavatnslausir eftir að heitavatnslögn fór undir hraun í eldgosinu í gær. Ragnar Jón Hrólfsson ræddi um ástandið við Kristbjörgu Kamillu Sigtryggsdóttur, íbúa í Garði.
Aftur verður opnað fyrir ferðir Grindvíkinga inn í bæinn frá og með morgundeginum. Þetta var ákveðið eftir uppfært hættumat Veðurstofunnar síðdegis.
Benjamin Netanyahu, forsætisráðherra Ísraels, hefur fyrirskipað ísraelska hernum að hefja undirbúning á brottflutningi almennra borgara frá borginni Rafah í suðurhluta Gaza þar sem innrás sé nú yfirvofandi. Ragnar Jón Hrólfsson sagði frá.
