Fylgi Vinstri-grænna mælist minnst, síðbúið og langvinnt hret í spánni og rafmagn kemst á í Grindavík
Þingflokkur Vinstri grænna myndi þurrkast út, væri kosið nú, samkvæmt nýjum Þjóðarpúlsi Gallup. Samfylkingin mælist enn stærsti flokkurinn, með 30% fylgi.
Óvenju síðbúnu og langvinnu hreti er spáð í vikunni. Appelsínugular veðurviðvaranir gilda frá Ströndum, Vesturlandi og Vík í Mýrdal austur yfir landið vegna norðvestanstorms og hríðar.
Héraðsdómur Reykjaness sýknaði í dag Kolbein Sigþórsson, fyrrverandi knattspyrnumann, af ákæru fyrir kynferðisbrot gegn stúlkubarni.
Nigel Farage, nýr leiðtogi Umbótaflokks Bretlands og einn helsti leiðtogi Brexit-sinna, staðfesti í dag framboð sitt í komandi þingkosningum.
Íslenskir snyrtivöruframleiðendur þurfa ekki vottun til að markaðssetja vöru sína sem lífræna. Herða þarf lagaumhverfið um ört vaxandi markað, segir verkefnastjóri Lífræns Íslands.
