Í gær ræddum við öryggi orkuinnviða við framkvæmdarstjóra Samorku en þjóðir Evrópu hafa verið að fara yfir öryggismál hjá sér í kjölfar breyttrar heimsmyndar. Rauði krossinn á Íslandi hefur lengi hvatt íbúa til að útbúa svokallaðan viðlagakassa. Aðalheiður Jónsdóttir, teymisstjóri Neyðarvarna hjá Rauða krossinum rifjaði upp með okkur hvað þarf að vera í kassanum.
Borgarlínan er stöðugt í umræðunni á höfuðborgarsvæðinu og verður sjálfsagt áfram. Sitt sýnist hverjum um kostnaðinn og leiðina sem á að fara. Nú í vikunni skrifuðu Kjartan Már Kjartansson, bæjarstjóri Reykjanesbæjar, Orri Björnsson, oddviti Sjálfstæðisflokksins í Hafnarfirði og Runólfur Ágústson grein og birtu á Vísi undir yfirskriftinni “Lest í stað Borgarlínu”. Runólfur hefur áður komið að umræðu um lestar á Íslandi. Hann útskýrði betur hvað þeir þremenningar eru að gera tillögur um.
Háskóladagurinn 2026 mun fara fram í Reykjavík á laugardaginn. Í kjölfarið munu svo háskólar landsins ferðast á þrjá staði á landsbyggðinni að kynna námsframboð og námsleiðir sínar. Þau Ásrún Aldís Hreinsdóttir, nemandi í Háskóla Íslands og James Einar Becker, kynningarstjóri hjá Landbúnaðarháskóla Íslands komu til okkar.
Tónlistarkonan Ragna Kjartansdóttir, betur þekkt sem Cell7, er ein af frumkvöðlum hip-hop senunnar á Íslandi. Hún fann sína hillu í tónlist 12 ára gömul og er tónlistin enn hennar helsta tjáningarform en hún hefur gefið út þrjár stórar plötur undir nafninu Cell7 og sú nýjasta kom út í fyrra. Ragna var meðlimur í Subterranean en fyrr í dag bárust þau tíðindi að sveitin kæmi saman á sviði í fyrsta sinn eftir áratugahlé. Ragna var föstudagsgestur hjá okkur.
Vegagerðin kynnti afrakstur tilboða í áætlunarflug til Ísafjarðar í gær og kom þá í ljós að aðeins eitt tilboð hafði borist. Það tilboð var frá Icelandair og reyndist vera tæplega 2,2 milljörðum hærra en kostnaðaráætlun Vegagerðarinnar. Ekki hefur komið fram hver næstu skref verða og vænta má þess að uggur sé í Vestfirðingum vegna þessa. Bæjarstjóri Bolungarvíkur, Jón Páll Hreinsson var á línunni hjá okkur og við spurðum hann um hljóðið í heimafólki.
Hvað er fram undan í helstu bolta íþróttum helgarinnar? Einar Örn Jónsson leiddi okkur í gegnum það.
Hin sívinsæla Vika með Gísla Marteini verður vitanlega á sínum stað í kvöld, sum vilja meina að það séu alltaf sömu gestir í sófanum en nú verður ekki einu sinni sami rass í sæti umsjónarmanns. Í kvöld verður það nefnilega Vikan með Berglindi Festival. Berglind kíkti við hjá okkur.
