Síðdegisútvarpið

Kjarnorkuklausan, þjóðhátíðarlög, bílastæðavesen og fótbolti

Það er allt í hers höndum á alþingi þar sem enn er rætt um veiðigjaldafrumvarp. Málsþófsmet hefur verið slegið og hefur málið nú verið rætt í hátt í 160 klukkustundir. Fyrrverandi þingmaður pírata Smári McCarthy gagnrýnir þetta harðlega í aðsendri grein á vísi í dag og ræddi stöðu mála við okkur.

Klukkan sjö á eftir er síðasti leikur íslenska landsliðsins knattspyrnu á EM þegar stelpurnar okkar mæta Noregi. Mikil vonbrigði eru með frammistöðu liðsins og umræða í þjóðfélaginu um hvort ekki þurfi að gera breytingar á þjálfara teyminu. Við veltum vöngum yfir genginu á EM og framtíðinni undir stjórn Þorsteins Halldórssonar með þeim Öddu Baldursdóttur sem er sérfræðingur RÚV í Stofunni og hinum þrautreynda íþróttafréttamanni Valtý Birni Valtýssyni.

Eins og við ræddum hér í síðustu viku getur verið fokdýrt að leggja við náttúruperlur úti á landi, en í ofanálag er flækjustigið töluvert þegar kemur að því að borga fyrir stæðin. Við ræddum við Kristján G. Kristjánsson hjá Mountain taxi.

Slökkviliðs- og sjúkraflutningamaðurinn Bergur Vilhjálmsson lagði af stað í 400km göngu frá Goðafossi yfir Sprengisand til Reykjavíkur – með 170kg í farteskinu á mánudaginn, undir yfirskriftinni Skrefið fyrir vonina. Þetta gerir hann til að vekja athygli á þeim þunga bagga sem einstaklingar með sjálfsvígshugsanir bera og til að styrkja og vekja athygli á Píeta samtökunum. Við slógum á þráðinn til Bergs.

Hljómsveitin Stuðlabandið á heiðurinn að þjóðhátíðarlaginu í ár, við Eldana. En það var ekki nóg að taka upp lagið í ár, heldur ákváðu þeir í beinu framhaldi að endurgera nokkur af sínum uppáhalds þjóðhátíðarlögum og birtu það fyrsta síðasta föstudag. Þeir Sigþór Árnason og Baldur Kristjánsson komu til okkar.