Síðdegisútvarpið

Veiða og sleppa, öryggi í Reynisfjöru, gleðiganga og uppseld ást

Banaslysið í Reynisfjöru á dögunum þegar ung stúlka drukknaði situr enn í okkur mörgum og slysið hefur vakið upp mikla umræðu um hætturnar sem þarna skapast við ákveðnar aðstæður. Gunnar Helgason rithöfundur tjáði sig á FB fyrr í dag og segist ekki trúa öðru en að hægt verði að koma í veg fyrir slys í fjörunni. Við hringdum í Gunnar.

Jón Kristjánsson fiskifræðingur skrifaði pistil á dögunum á vefnum Flugufréttir en þar segist Jón ekki hissa á dræmri laxveiði í ám landsins og fyrir því séu margar ástæður. Ein þeirra sé aðferðin veiða og sleppa. Svo við vitnum beint í grein Jóns þá segir hann „Það sem verið er að gera núna er ekki aðeins ár­ang­urs­laust held­ur bein­lín­is skaðlegt fyr­ir þá sem vilja njóta þess að veiða og éta lax sem er hin mesta holl­ustu­vara en nær ómögu­legt að fá, svo mat­gæðing­ar verða að éta hinn ill­ræmda eld­islax,“ seg­ir Jón Kristjáns­son fiski­fræðing­ur. Jón ræddi þetta umdeilda mál við okkur.

Hápunktur Hinsegin daga verður á morgun þegar Gleðigangan fer frá Skólavörðuholti. Og einn af hápunktum þeirrar göngu er alla jafna vagn Páls Óskars, sem leggur ekki minni metnað hann þetta árið en áður. Við bjölluðum í Palla.

Kvikmyndin ástin sem eftir er er nánast uppseld í kjölfar frumsýningar hennar á kvikmyndahátíðinni í Cannes í maí. Framleiðendum myndarinnar hefur gengið vel að selja myndina til dreifingaraðila um víða veröld og nu er svo komið að myndin hefur verið seld á nánast alla markaði. Við fengum Anton Mána Svansson framleiðanda myndarinnar til okkar.

Miðar á 50 ára afmælistónleika Sumars á Sýrlandi í nóvember seldust upp á örskotsstundu og hefur aukatónleikum verið bætt við. Einvalalið tónlistarmanna leggja Stuðmönnum lið á tónleikunum, en auk þeirra tilkynnt komu sína sjálfir lykilhöfundarnir og upphaflegu flytjendur þessara sögufrægu laga — þeir Valgeir Guðjónsson, Egill Ólafsson og Sigurður Bjóla — en þessir þrír hafa ekki komið fram saman á Stuðmannasviði síðan 1976. Við ræddum við stuðmanninn Jakob Frímann Magnússon.