Síðdegisútvarpið

4. ágúst

Felix Bergsson og Júlía Margrét Einarsdóttir eru í verslunarmannahelgarstuði hvort sem það er uppá palli, inní tjaldi eða bara í sumarbústað.

Við verðum með puttann á púlsinum og heyrum í dag í okkar konum sem eru á ferð og flugi á landsbyggðinni. Hrafnhildur Halldórsdóttir er á leið í Kerlingarfjöll og kom við á Laugarvatni á leiðinni. Við fáum kveðju þaðan. Og svo er Steiney Skúladóttir að undirbúa Hljóðveg 1 sem verður á morgun sendur út frá Neskaupsstað. Hún er stödd á Fáskrúðsfirði og verður á línunni úr blíðunni.

Bjarni Ólafur Guðmundsson verður kynnir á Þjóðhátíð í ár en hátíðin hefur vaxið ótrúlega og er nú einhver stærsta tónlistarhátíð landsins. Bjarni Ólafur eða Daddi eins og alþjóð þekkir hann verður á línunni og við heyrum af stemmningunni í Eyjum og því sem stendur til næstu daga.

Áhrifavaldurinn og matarstílistinn Linda Benediktsdóttir, eða Linda Ben, er útilegusjúk og nýtir hvert tækifæri til að pakka saman og fara á flakk með fjölskylduna og húsbílinn. Hún og eiginmaðurinn eru núna stödd í Varmalandi í Borgarfirði með börnum sínum tveimur og nokkrum vinum. Það getur verið vandasamt verk að pakka niður fyrir langt ferðalag og finna nesti, dvalarstað og afþreygingu við allra hæfi. Hún ætlar að vera á línunni og gefa okkur góð ráð fyrir ferðalagið.

En við hefjum þáttinn með Samgöngustofu. Á línunni er Einar Magnús Magnússon sérfræðingur í öryggis og fræðsludeild sem ætlar að standa umferðarvaktina alla Verslunarmannahelgina.

Frumflutt

4. ágúst 2023

Aðgengilegt til

3. ágúst 2024