Í 29 ár hefur tónleikaröðin „Sumarjazz á Jómfrúnni“ verið fastur liður á laugardögum á Jómfrúartorginu við Lækjargötu í Reykjavík. Á bak við tónleikaröðina stendur veitingaúsið Jómfrúin með Jakob Einar Jakobsson veitingamann í broddi fylkingar. Listrænn stjórnandi er eins og undanfarin ár saxófónleikarinn Sigurður Flosason. Og tónleikaröðin er verðlaunaður viðburður hún fékk verðlaun sem tónlistarviðburður ársins 2023 á Íslensku tónlistarverðlaununum nú nýverið. Þeir Jakob Einar Jakobsson, á Jómfrúnni, og Sigurður Flosason komu til okkar.
Framundan eru stórar breytingar á leiðakerfi Strætó vegna framkvæmda Reykjavíkurborgar við Hlemm. En hverjar eru breytingarnar og mun Strætó eiga afturkvæmt á Hlemm? Jóhannes Svavar Rúnarsson framkvæmdarstjóri Strætó var á línunni.
Við ræddum hinar fjölbreyttustu hefðir, siði og venjur sem við tengjum mismikið við lýðræðishátíðina sem kosningadagur er. Albert Eiríksson drakk með okkur morgunbollann og setti okkur inn í málið.
Við höfum hálfpartinn verið í kosningabaráttu frá áramótum og henni líkur loks á morgun, tæpu hálfu ári síðar. Við litum yfir farinn veg og spáðum í spilin með stjórnmálafræðingunum Evu Marín Hlynsdóttur og Viktori Orra Valgarðssyni.
Og til að fara yfir fréttir vikunnar, sem eflaust verða litaðar af forsetakosningunum á morgun ásamt gosi og fleiru, komu til okkar fréttahaukarnir Heimir Már Pétursson af Stöð 2 og Aðalsteinn Kjartansson af Heimildinni en báðir hafa stjórnað sjónvarpskappræðum með forsetaframbjóðendum í vikunni.
Lagalisti:
Trúbrot - My Friend And I
Kári Egilsson - In the morning
Meghan Trainor - All About That Bass
Valdimar Guðmundsson & Memfis - Það styttir alltaf upp
GDRN - Næsta líf
