Druslugangan verður gengin í tólfta sinn í Reykjavík á laugardaginn. Gengið verður frá Hallgrímskirkju á Austurvöll þar sem samstöðufundur með ræðuhöldum og lifandi tónlistarflutningi fer fram. Gangan fór fram í fyrsta sinn árið 2011 og grunngildi hennar snúast um að færa ábyrgð kynferðisglæpa frá þolendum yfir á gerendur. Þær Lísa Margrét Gunnarsdóttir og Margrét Baldursdóttir, meðlimir í skipulagsteymi Druslugöngunnar, komu til okkar.
Við munum miklu betur það sem við teiknum. Það eru að minnsta kosti niðurstöður nýrrar rannsóknar eftir Dr. Unni Guðrúnu Óttarsdóttur listmeðferðarfræðing. Hún segir að eftir því sem best sé vitað sé þetta í fyrsta sinn sem svona rannsókn á minni með teikningu og skrifuðum orðum sé framkvæmd. Unnur Guðrún kom til okkar og sagði okkur frá þessari athyglisverðu rannsókn.
Menntamál hafa verið til umræðu undanfarið. Mennta- og barnamálaráðuneytið kynnti áform um að veita ráðherra heimild til að leggja niður samræmd könnunarpróf til frambúðar. Nýtt námsmat, svokallaður matsferill, á að leysa samræmdu prófin af hólmi en uppi eru efasemdir um að það kerfi verið tilbúið nægilega fljótt. Áformin hafa verið gagnrýnd úr ýmsum áttum, og talað um að taka ætti samræmdu prófin upp að nýju. Svo hafa aðrir verið ósammála því, eins og formaður Kennarasambandsins og fleiri. Til að ræða þessi mál kom til okkar Ásmundur Einar Daðason, mennta- og barnamálaráðherra.
Hvernig er fasteignamarkaðurinn á höfuðborgarsvæðinu þessa dagana? Er júlí alveg steindauður þegar kemur að sölu? Þá hafa verið fréttir af því að sölur taki lengri tíma en áður og mikið sé um að sölukeðjur slitni vegna þess að fólk kemst ekki í gegnum greiðslumat. Er það eitthvað meira núna en áður? Páll Heiðar Pálsson fasteignasali ræddi við okkur um markaðinn og hvernig hann metur stöðuna inn í haustið.
Lagalisti:
Eyþór Ingi Gunnlaugsson - Hugarórar
Coldplay- Clocks
David Kushner - Daylight
Todmobile - Ég Heyri Raddir
Suede - Beautiful ones
Benjamin Ingrosso - Look who's laughing now
Jessie J & B.O.B. - Price tag
Luke Combs - Fast Car
