Kastljós

Agavandamál í grunnskólum, Þorgrímur Þráinsson og Kjarnasamruni í Suður- Frakklandi

Málefni Breiðholtsskóla hefur verið töluvert til umræðu eftir að greint var frá ofbeldi af hálfu nemenda skólans í garð annara nemenda. Þetta vandamál virðist vera víðar í grunnskólum landsins og frásagnir foreldra af ofbeldi sem ríkir í skólanum hefur orðið kveikjan að umræðu um hvort kennara, og starfsfólk skóla, skorti úrræði til að takast á við þann vanda sem blasir við. Gestir Kastjóss eru Steinn Jóhannsson sviðsstjóri skóla- og frístundasviðs Reykjavíkurborgar og Birna Gunnlaugsdóttir, kennari og trúnaðarmaður kennara í Breiðholti.

Það eru líklega fáir með meiri innsýn í líðan ungs fólks á Íslandi nú á dögum en rithöfundurinn Þorgrímur Þráinsson. Þorgrímur hefur undanfarin 15 ár heimsótt hvern einasta grunnskóla á landinu og rætt við börn í 10. bekk. Kastljós hitti Þorgrím á Akureyri.

Umhverfisvá og orkuskortur veldur því að athyglin beinist nú sífellt meir að hugmynd sem kviknaði á tímamótafundi forsetanna Reagans og Gorbachevs fyrir 40 árum. Hugmynd um að draga úr vígbúnaði og setja orku og fjármagn stórveldanna frekar í að virkja nýja, hreina og óþrjótandi orkulind sem kenningar höfðu vaknað um nokkrum áratugum fyrr. “Óþrjótandi okrulind, öllu mannkyninu til hagsbóta” eins og forsetarnir orðuðu það í yfirlýsingu sinni. Þótt draumurinn um afvopnun hafi nú dáið er draumurinn um nýju orkulindina enn við lýði. Jón Björgvinsson heimsótti risavaxna rannsóknarstöð í Suður-Frakklandi sem stofnuð var í kjölfar leiðtogafundarins og ætlað er að finna leið út úr umhverfis- og orkuvandanum sem nú steðjar að jarðabúum.