Hátíðahöldum um allt land er hvergi nærri lokið þó langt sé liðið á sumarið. Ýmsar hátíðir eru á dagskrá um helgina, þar á meðal Vatnsdæluhátíð í Húnabyggð. Við heyrðum í Elfu Þöll Grétarsdóttur skipuleggjanda og forvitnuðumst um hátíðina.
Rósa Guðbjartsdóttir bæjarstjóri í Hafnarfirði var gestur okkar í gærmorgun þar sem hún ræddi gjaldfrjáls námsgögn og skólamáltíðir meðal annars. Rósa sagði sveitarfélögunum hafa verið stillt upp við vegg varðandi gjaldfrjálsar skólamáltíðir og hún hefði kosið aðra aðkomu ríkisins að kjarasamningum. Ásmundur Einar Daðason mennta- og barnamálaráðherra kom til okkar í dag og brást við þessu.
Stærsta þungarokkshátíð heims fer fram í Wacken í Þýskalandi í byrjun ágúst ár hvert. Þangað streymdu 85 þúsund rokkarar til að hlusta á 250 tónlistaratriði með hátt í 200 hljómsveitum og listamönnum. Síðustu tuttugu árin hafa Íslendingar farið í skipulagða hópferð á staðinn sem skipuleggjendur kalla helga jörð. Brynjólfur Þór Guðmundsson fréttamaður brá sér í för með þeim þetta árið og reyndi að komast að því hvers vegna fólk fer aftur og aftur á sömu hátíðina.
Starfsumhverfi lækna á Íslandi hefur lengi verið mjög erfitt og úrbætur gerast hægt, segir Steinunn Þórðardóttir formaður Læknafélags Íslands. Mannekla sé komin á verulega slæman stað og hættan á alvarlegri kulnun lækna og brotthvarfi úr starfi mikil. Hún segir mikilvægt að stéttinni sé gert kleift að sinna hlutverki sínu gagnvart fólkinu í landinu og ryðja þurfi öllum hindrunum úr vegi til að svo megi vera. Steinunn kom og ræddi þetta við okkur.
Svo kom Björn Berg Gunnarsson til okkar í fjármálaspjallið. Hann talaði við okkur um fyrirbærið að kaupa núna og borga síðar – leið sem er töluvert auglýst þessa dagana en getur reynst varasöm.
Lagalisti:
Ragnheiður Gröndal - Flowers in the Morning
Paolo Nutini - New shoes
Jónas Sig & Lúðrasveit Þorlákshafnar - Fortíðarþrá
Iceguys - Gemmér Gemmér
Nýdönsk - Fullkomið farartæki
David Bowie & Pat Metheny - This Is Not America
Ben E. King - Stand By Me
Sting - Desert Rose
Kings of Leon - Sex On Fire
