Nú styttist óðfluga í jólahátíðina og við reiknum með að jólatréssala eigi eftir að taka kipp um helgina, á línunni hjá okkur var Örn Alexander Ámundason sem selur jólatré á Hólmsheiði.
Fyrir um tveimur vikum komu til okkar mæður tveggja einhverfra drengja sem geta ekki tjáð sig með tali. Þær ræddu hvernig íslensk börn bíða mánuðum eða árum saman eftir greiningu, meðferð og stuðningi sem þau eiga rétt á. Fimm ára sonur annarar þeirra er númer 1230 á biðlista til talmeinafræðings þrátt fyrir að hafa beðið hálfa ævina. Í dag gerði þingmaður Samfylkingarinnar, Sigmundur Ernir Rúnarsson, það sem hann kallar biðlistaómenningu að umræðuefni á Alþingi og var heitt í hamsi. Sigmundur Ernir var á línunni.
Birgitta Haukdal barnabókahöfundur hefur þeyst um landið að lesa upp úr bókum sínum undanfarið og við heyrðum í henni og spurðum hvernig hefur gengið og hvað sé framundan?
Björn Bragi Arnarsson kíkti til okkar í kaffi og ræddi spurningakeppnir og spil. Lokaþáttur Kviss, sem hann stýrir, fer í loftið á Sýn annað kvöld en það er óhætt að segja að nokkuð óvenjuleg lið séu að keppa til úrslita á morgun.
Fjallað var um dvínandi aðsókn á íslenskar kvikmyndir og þróun bíómenningar á Íslandi í grein í Morgunblaðinu í morgun. Eru streymisveitur að ganga frá bíóhúsunum eða eiga bíóin bjarta framtíð eftir erfiða tíma undanfarið? Við spáðum aðeins í þessi mál með Þorvaldi Árnasyni framkvæmdastjóra Samfilm sem hefur starfað í bíóbransanum í áratugi.
Við fengum veður af því að í Hellunum við Hellu sé að finna eina minnstu og krúttlegustu bókabúð landsins. Við hringdum í Ólöfu Þórhallsdóttur framkvæmdastjóra Hellanna við Hellu og heyrðum af nýju bókabúðinni og sögu þessara merkilegu hella.
