Sumarborgin er verkefni á vegum Reykjavíkurborgar til að efla mannlíf og menningu og styðja þannig við fyrirtæki; verslun, veitingastaði og aðra þjónustu í miðborginni. Kramhúsið hefur heldur betur tekið þátt í þessu verkefni og boðið uppá ýmiskonar námskeið í sumar. Má þar nefna afró, magadans, yoga og söngleikjadans. Þær Erna Guðrún Fritzdóttir og Sandra Sano Erlingsdóttir sögðu okkur frá þessu skemmtilega framtaki.
Tungumálatöfrar er heiti námskeiða fyrir fjöltyngd börn sem vilja æfa betur íslenskuna og fara þau nú fram í áttunda sinn í byrjun ágústmánaðar og nú á Flateyri við Önundarfjörð. Námskeiðin sem í boði snerta á skapandi útivist og svo myndlist og tónlist. Tungumálatöfrar eru ætluð börnum á aldrinum 5-9 ára og svo aftur 10-14 ára, einkum tvítyngdum og fjöltyngdum börnum en vitaskuld öll velkomin. Anna Sigga er verkefnastjóri Tungumálatöfra og hún sagði okkur frá þessu töfrandi verkefni.
Það er frí í skólum og leikskólum og margir foreldrar líklega farnir að lemja hausnum utan í vegg yfir hvað er hægt að gera með börnunum. Leikum okkur er Facebook hópur og instagram síða með yfir 11þúsund fylgjendum þar sem Alma Rut setur inn hinar ýmsu hugmyndir af afþreyingu fyrir börn og fullorðna. Framtakið er hrátt og heimilislegt og er einfaldlega hugsað til að hafa gaman. Alma Rut Ásgeirsdóttir var á línunni hjá okkur.
Hvað er í matinn er vikulegur dagskrárliður hér á Hljóðvegi 1, þar höfum við fengið góða gesti til þess að kokka fram hugmyndir fyrir okkur og hlustendur um hvað við ættum að hafa í matinn í kvöld eða næstu daga. Maria Jimenez Pacifico er uppfull af góðum hugmyndum um góðan mat, hún er nýkomin af Götubitahátíðinni, einni stærstu matarhátíð landsins, sem fram fór um helgina en þar hreppti hún 3. sætið yfir besta Götubitann. Í fyrra vann hún keppnina yfir besta grænmetisréttinn og 2. sæti yfir besta smábitann.
Það er mikið ævintýri að skoða Ævintýragarðinn við Oddeyrargötu á Akureyri því þar hefur eigandinn smíðað ýmsar skemmtilegar persónur úr þekktum ævintýrum og dreift um garðinn. Hreinn Halldórsson, alþýðulistamaður og konungur ríkisins, segir garðinn vera einkagalleríið sitt, lifandi undir berum himni.
