Það má segja að Edda Björgvinsdóttir leikkona ætli að taka eftirlaunaárin með trompi eða nýju unglingsárin eins og hún vill kalla þau því hún hefur safnað háskólagráðum síðustu ár samhliða fullri vinnu. Hún er komin með meistaragráðu í menningarstjórnun þar sem lokaritgerð hennar fjallaði um húmor í stjórnun. Hún hefur einnig lagt stund á diplómanám í jákvæðri sálfræði og sálgæslu og nú síðast lauk hún jógakennaranámi í vor og Edda kom í þáttinn í dag til að ræða það og margt fleira sem á daga hennar hefur drifið, en hún lauk nýverið margra vikna tökum á sjónvarpsþáttaröðinni Felix og Klara sem verður sýnd á RÚV.
Við fræddumst svo um verkefnið Bjargráð í þættinum. Bjargráð styður fjölskyldur sem eiga fjölskyldumeðlim eða vin í fangelsi, að bíða afplánunar eða sem er að klára afplánun. Bjargráð er sem sagt til staðar fyrir mæður, feður, börn, maka, fyrrverandi maka, ömmur og/eða afa sem þurfa að tala um erfiðar tilfinningar og áskoranir sem kunna að fylgja nýjum veruleika við það að eiga einhvern nákominn í þessari stöðu. Þau Jenný Þórkatla Magnúsdóttir og Eiríkur Steinarsson, sem bæði eru fjölskyldufræðingar hjá Bjargráði, komu til okkar í dag og sögðu okkur meira frá þessu verkefni, en hægt er að nálgast upplýsingar um það á heimasíðunni www.faff.is.
Svo var fugl dagsins auðvitað á sínum stað.
Tónlist í þættinum:
Skýið / Sigríður Beinteinsdóttir (Björgvin Halldórsson, texti Vilhjálmur Vilhjálmsson)
Heiðlóan / Gísli Magna (Steingrímur M. Sigfússon)
Með þér / Ragnheiður Gröndal (Bubbi Morthens)
Ef þú ert mér hjá / Mannakorn (Magnús Eiríksson)
UMSJÓN GUNNAR HANSSON OG HELGA ARNARDÓTTIR
