Umsjón: Ingvar Þór og Hafdís Helga
Jón Ólafsson, prófessor við Háskóla Íslands og sérfræðingur í málefnum Rússlands, verður á línunni hjá okkur í upphafi þáttar. Við ræðum stöðuna í Úkraínu og Rússlandi en búist er við að utanríkisráðherra Bandaríkjanna tilkynni um viðbótar framlag upp á einn milljarð Bandaríkjadala í tveggja daga heimsókn sinni til Úkraínu.
Finnur Oddsson, forstjóri Haga, spurði í Morgunblaðinu í gær hvort matur væri raunverulega dýr á Íslandi. Hann sagði að færa mætti rök fyrir því að það væri ódýrara fyrir heimafólk að kaupa í matinn hérlendis en á flestum stöðum í Evrópu, að minnsta kosti hlutfallslega miðað við útgjöld eða laun. Auður Alfa Ólafsdóttir, verkefnastjóri verðlagseftirlits ASÍ, mætir til okkar og fer yfir þróun á matarverði hér heima.
Um 54 prósent þjóðarinnar eru hlynnt því að leyfa katta og hundahald í fjölbýli án þess að tveir þriðju eigenda sem hafa sameiginlegan inngang eða stigagang, þurfi að samþykkja það. 13 prósent eru hlutlaus en þriðjungur þeirra sem tók þátt í könnun Prósents um málið er andvígur. Við ræðum niðurstöður könnunarinnar, lögin í kringum dýrahald og deilur sem þeim tengjast við Sigurð Orra Hafþórsson, lögmann Húseigendafélagsins.
Nýlega birtu tveir læknar grein þar sem vakin var athygli á skaðsemi sólarvarnar og eftir standa foreldrar og fleiri uppi með spurninguna: eru börnin okkar betur sett án sólarvarnar? Baldur Tumi Baldursson húðlæknir ræðir þau mál við okkur.
Mikil aukning hefur orðið á krabbameinsgreiningum hjá ungu fólki á vesturlöndum síðustu þrjá áratugi. Sérfræðingar segja alkahól, tóbak og slæmt matarræði þar helst vera um að kenna. En hvað eigum við að borða til að fara eftir nýjustu ráðleggingum. Þórhallur Halldórsson faraldsfræðingur við matvæla og næringarfræðideild HÍ ætlar að fara yfir nýjar norrænar ráðleggingar um matarræði með okkur.
Þennan dag, 7. september, árið 1970 fundaði 20 kvenna framkvæmdanefnd íslensku rauðsokkuhreyfingarinnar í fyrsta sinn. Þar voru línurnar lagðar fyrir kvenréttindabaráttuna hér á landi. Í dag, rúmlega hálfri öld síðar verður haldið málþing sem beinir sjónum að arfleifð hreyfingarinnar. Þar tekur Anna Gréta Rúdolfsdóttir til máls. Hún kemur til okkar og segir okkur frá sínum rannsóknum.