17. ágúst - Strætó, norðurland, eldstöðvar og eitursveppir
Umsjón: Rúnar Róbertsson og Hafdís Helga Helgadóttir
Undanfarin ár hefur Strætó bs verið með gjaldlausar ferðir í miðborg Reykjavíkur í tilefni af Menningarnótt en í ár verður breyting á. Jóhannes Rúnarsson framkvæmdastjóri Strætó kom til okkar af þessu tilefni. Og til að ræða rekstrarstöðuna hjá Strætó bs og framtíðarhorfur.
Aldrei hafa skráðar gistinætur á hótelum verið fleiri í júní á Norðurlandi en á þessu ári. Fjölgunin er 8% á milli ára. Þróunin í nýtingu herbergja í þessum mánuðum hefur verið á uppleið síðustu ár. Norðlendingar hafa lengi reynt að efla ferðaþjónustuna í heimabyggð í umhverfi þar sem flestir ferðamenn fara Suðurlandið í heimsókn sinni til Íslands. En svo virðist sem að árangur sé að nást að fá ferðamenn til þess að skoða norðurlandið sem kost í ferðalögum sínum. Við heyrðum í Jóhannesi Árnasyni sem er verkefnastjóri áfangastaðaþróunar hjá Markaðsstofu Norðurlands.
Það er ekki fyrr hætt að gjósa a Reykjanesskaga þegar að landris mælist jafnt við Öskju og Torfadalsjökul. Síðast gaus í Torfadalsjökli á fimmtándu öld en skemmra er síðan Askja gaus eða árið 1961. Hvað má lesa í nýjustu mælingar og hvers vænta vísindamenn? Páll Einarsson jarðeðlisfræðingur kom til okkar.
Mikið hefur verið fjallað um fjölskylduharmleik í heimspressunni. Áströlsk kona bauð fjórum ástvinum í mat sem varð síðasta máltíð þriggja þeirra því í wellington steikinni var að finna banvæna sveppi sem vaxa í Ástralíu. Rannsókn stendur yfir á því hvort um morðmál eða slys sé að ræða. En hér á landi er sveppatýnsla komin á fullt og þá er okkur spurn -finnast álíka banvænir sveppir í flórunni hér á landi? Guðríður Gyða Eyjólfdóttir sveppafræðingur svarar því.