Morgunútvarpið

Björgvin Páll, Tolli, Roblox, Bosk og heljarstökkið umdeilda

Fatahönnuðurinn Berglind Ósk Hlynsdóttir, sem kallar sig Bosk, vinnur eingöngu með ónýttan textíl, sem gefur henni ákveðinn ramma til að vinna inni í. Hún kom til okkar í Morgunútvarpið og ræddi um endurvinnslu í hönnun og mikilvægi þess að hafa aðgang að tækjum og tólum til endurvinnslu. Berglind flytur erindið Þráhyggja fyrri endurvinnslu á vegum Miðstöð hönnunar og arkitektúrs í Grósku í dag en þar er sjónum beint að stöðu og framtíð hönnunar og arkitektúrs.

Edrúvika Krýsuvíkursamtakanna stendur nú yfir en í henni eru landsmenn hvattir til að sleppa áfengi og gefa í staðinn andvirðið til Krýsuvíkur. Sem stendur eru um 120 einstaklingar á biðlista eftir meðferð í Krýsuvík, flestir þeirra ungt fólk í miklum vanda. Samkvæmt samtökunum er nauðsynlegt að stytta þessa biðlista, nokkuð sem krefst aukins fjármagns og víðtækari þjónustu. Með fyrirhugaðri opnun áfangaheimilis verður hægt að taka á móti 41 einstaklingi samtímis í stað 29, sem mun stytta biðlistana verulega og bjarga mannslífum. Tolli Morthens hefur unnið náið með Krýsuvík og kom í Morgunútvarpið í spjall.

Björgvin Páll Gústavsson, aldursforseti íslenska karlalandsliðsins í handbolta, birti áhugaverða færslu á Instagram á dögunum þar sem hann fór yfir fúkyrðaflaum netverja um sjálfan sig á meðan á EM í handbolta stóð yfir. Hann segir að þrátt fyrir að hann hafi ekki spilað mikið á mótinu hafi gagnrýnin og viðbjóðurinn aldrei verið meiri — eitthvað sem hann segist elska. Björgvin Páll mætti í Morgunútvarpið í spjall.

Börn á aldrinum 9 til 12 ára sem nota TikTok, Instagram og Snapchat er að fækka en á sama tíma fjölgar þeim sem nota Roblox, sem er einskonar samfélagsmiðill í dulargervi tölvuleiks. Þetta kemur fram í niðurstöðum rannsóknarinnar Börn og netmiðlar sem Netvís - Fjölmiðlanefnd og Menntavísindasvið Háskóla Íslands framkvæmdu. Skúli Bragi Geirdal, sviðsstjóri hjá Netvís, fór yfir þessar niðurstöður með okkur og hvað þær þýða.

Bandaríski listskautakappinn Ilia Malinin sýndi ótrúleg tilþrif á Ólympíuleikunum á Ítalíu þegar hann þegar hann sýndi afturábak heljarstökk sem hefur verið bannað í 50 ár sökum þess hve hættulegt það er. En hvað er svona hættulegt við það og af hverju er búið að leyfa það aftur. Ásdís Rós Clark er sérfræðingur á þessu sviði og fræddi okkur um málið.