Morgunútvarpið

Icelandair,Hugarafl,ESB,og Elín Hirst og Kári Stefáns um uppgröftinn á Þingvöllum

Ný úttekt á starfsemi Hugarafls, stærstu grasrótarsamtaka fólks með andlegar áskoranir á Íslandi, sýnir að samtökin skila samfélagslegum og opinberum ávinningi upp á um 482 milljónir króna á ári með því að styðja fólk með geðrænar áskoranir til aukinnar virkni, bata og þátttöku í samfélaginu. Úttektin var kynnt á dögunum en þrátt fyrir aukið umfang starfseminnar hefur fjármögnun Hugarafls ekki haldið í við fjölgun notenda né verðlagsþróun. Grétar Björnsson, formaður Hugarafls, kom til okkar.

Kjaradeila Icelandair og flugmanna hefur stökkbreyst í umræðu um framtíð félagsins og traust eigenda á rekstrinum. Lítið virðist þokast í deilunni og fölmargar flugferðir hafa verið felldar niður undanfarið en tvennur sögum fer af því af hverju það hefur verið gert. Þá hafa flugmenn sagt að rekstur Icelandair byggja á því að fá að kaupa frídaga af flugmönnum, sem vilja heldur verja tíma með fjölskyldum sínum. Aðilar málsins eru komnir í fjölmiðlabann að beiðni ríkissáttasemjara en Jón Karl Ólafsson fyrrverandi forstjóri Icelandair kom til okkar og ræddi málin.

Þingvallanefnd getur ekki veitt leyfi án dómsúrskurðar til að opna gröf og komast að beinum þjóðskáldsins Jónasar Hallgrímssonar vegna DNA-sýnatöku. Iðulega hafa verið uppi bollaleggingar að í gröfinni hvíli danskur bakari en ekki Jónas. Unnið er að gerð heimildarmyndar um Jónas Hallgrímsson en fjölmiðlakonan Elín Hirst fer fyrir hópi þess fólks sem vill opna gröf Jónasar ásamt Páli Valssyni sagnfræðingi. Elín kom til okkar ásamt Kára Stefánssyni.

Ljóst er að það verður tekist á um Evrópusambandið þangað til í ágúst þegar þjóðaratkvæðagreiðsla um framhald aðildarviðræðna fer fram. Tvær frænkur eru áberandi á sitthvorum enda umræðunnar, þær Snærós Sindradóttir, framkvæmdastjóri Evrópuhreyfingarinnar og Erna Bjarnadóttir, stjórnarmaður í Heimssýn. Við héldum áfram að ræða um ESB og fengum frænkurnar til okkar.