Morgunútvarpið

Flekaskil, tuttugu og eitthvað, hagvaxtaspá og stelpurnar okkar

Tuttugu og eitthvað er ný íslensk grínþáttaröð eftir Arnór Björnsson, Óla Gunnar Gunnarsson og Vigdísi Hafliðadóttur. Í þáttunum fylgjumst við með þremur ungmennum takast á við þær áskorarnir sem fylgja þrítugsaldrinum; háskólann, vinnumarkaðinn, sambandsdrauga, rappara og glataða æskudrauma. Óli Gunnar mætti til okkar ásamt leikstjóranum Kristófer Dignus.

Horfur eru á að sú kólnun sem hefur verið í hagkerfinu undanfarið vari lengur en áður var spáð. Hagvöxtur verður hóflegur og einkum drifinn áfram af þjónustuútflutningi. Horfur eru á að verðbólga verði 4,8% í ár og sennilegt er að stýrivextir verði hækkaðir upp í 8,25% á þessu ári. Þetta er meðal þess sem kemur fram í nýrri hagspá Greiningardeildar Landsbankans til ársins 2028, sem var birt í dag. Una Jónsdóttir, aðalhagfræðingur Landsbankans, kom í Morgunútvarpið og útskýrði þessar tölur fyrir okkur.

Talsmönnum skautunar í umræðu svelgdist á kaffinu sínu í vikunni þegar það kom í ljós að Þórdís Kolbrún Gylfadóttir Reykfjörð og Dagur B. Eggertsson eru byrjuð með hlaðvarp saman. Hlaðvarpið heitir Flekaskið og þar ræða þau breytta stöðu í alþjóðamálum og áhrifin á Ísland. Við fengum þau til okkar að ræða fréttir vikunnar og kannski örlítið um þetta nýja hlaðvarp.

Ísland mætir Englandi í undankeppni HM kvenna í fótbolta 2027 á Laugardalsvelli á laugardag. Stelpurnar okkar unnu Úkraínu 1-0 á Laugardalsvelli í vikunni en sigurinn var afar mikilvægur í baráttunni um þriðja sæti riðilsins sem er umspilssæti fyrir HM í Brasilíu á næsta ári. Athygli vakti að aðeins 1.500 manns mættu á leikinn gegn Úkraínu og stelpurnar vilja að sjálfsögðu sjá fleira fólk á Laugardalsvelli á laugardaginn. Landsliðskonurnar Guðrún Arnardóttir, sem leikur með Hammarby og Hlín Eiríksdóttir leikmaður Fiorentina komu til okkar í spjall.