Á dögunum var sagt frá því að Alvotech ætli að byggja þrjá leikskóla en áður hefur verið nokkur umræða um aðkomu atvinnulífsins að leikskólastiginu. Við ætlum að ræða þessi mál við Ingibjörgu Ósk Sigurðardóttur, dósent við menntavísindasvið Háskóla Íslands.
Við höldum síðan áfram að ræða jólamatinn, í þetta skiptið grænkera- og vegan mat, við Hrafnhildi Gunnarsdóttur, veitingakonu.
Bergdís Ester Gísladóttir Jensen verður á línunni frá Færeyjum þegar við ræðum færeyska ríkisútvarpið og uppsögn útvarpsstjórans þar eftir að í ljós kom að hann hefði heimilað einum manni að sleppa við útvarpsgjaldið.
Af hverju að valda upplýsingaóreiðu um mettaða fitu? Svona hefst pistill sem Jóhanna E. Torfadóttir, næringar- og lýðheilsufræðingur, Lektor við Miðstöð í lýðheilsuvísindum við Háskóla Íslands og verkefnisstjóri næringar hjá embætti landlæknis birti á vísi um helgina. Þar koma þau inn á háværar raddir um að hátt kólesteról í blóði og mettuð fita úr mat séu skaðlaus og í raun margra ára misskilningur að tengja slíkt við hjartasjúkdóma. Við ræðum málið við Jóhönnu.
Guðmundur Jóhannsson, tæknispekúlant Morgunútvarpsins, ræðir við okkur um fréttir úr heimi tækninnar.
Enn á ný hefur Andrés prins náð að valda usla, jafnt innan bresku konungsfjölskyldunnar sem og í öllu samfélaginu. Í þetta skiptið er það vegna vináttu hans við meintan kínverskan njósnara. Anna Lilja Þórisdóttir fréttamaður fer yfir málið með okkur.
